Rritja e çmimit të energjisë elektrike, shtrenjtimi i ujit, si dhe paralajmërimet për rritje të reja të çmimit të bukës dhe produkteve bazë, po e rëndojnë edhe më shumë jetën e pensionistëve në Kosovë.
Sekretari i Shoqatës së Pensionistëve, Sherif Kastrati, në një prononcim për FrontOnline ka deklaruar se pensionistët as më herët nuk kanë mundur t’ia dalin me pensionet aktuale, e lëre më tani me valën e re të shtrenjtimit.
“Pensionistët me ato pensione të ulëta nuk kanë mundur t’ia dalin më herët e lëre më tani me këto rritje të reja, keq ka qenë atëherë, keq është edhe tash’’, ka deklaruar Kastrati.
Sekretari i pensionistëve ka thënë se mbijetesa e pensionistëve varet kryesisht nga ndihma e familjarëve.
“Mos të ishin pasardhësit tanë, ne nuk do të mund t’ia dilnim’’, ka thënë ai për Front Online.
Institucionet shtetërore, sipas përfaqësuesit të pensionistëve, nuk po tregojnë asnjë interesim serioz për përmirësimin e gjendjes së kësaj kategorie. Pensionistët sipas Kastratit vazhdojnë të mbeten të harruar nga shteti dhe të lënë pas dore,
‘’Njëherë shteti nuk po shfaq interesim për pensionistët jemi të harruar nga shteti e të lënë pas dore’’, ka përfunduar Kastrati./Front Online
