Granit Xhaka dyshohet se i tha një tifozi “shihemi jashtë”, teksa u përfshi në një sherr të jashtëzakonshëm që bëri që ndeshja e West Hamit ndaj Sunderlandit të ndërpritej për pak çaste.
Kamerat televizive kapën momentin kur mesfushori i “Black Cats” po debatonte me tifozët e ulur pas pankinës së mysafirëve një sektor i rezervuar për biletat “hospitality”, ku tifozët përfitojnë ushqim dhe pije falas në London Stadium.
Një tifoz që ishte ulur shumë afër ka treguar për SunSport se çfarë pa dhe dëgjoi nga vendi i tij.
“Përplasja nisi pasi Nordi Mukiele u zëvendësua dhe ishte “qartazi i acaruar”, duke hedhur duart përpjetë dhe duke u ankuar ndaj trajnerit Regis Le Bris,” tha tifozi.
“Të gjithë po bërtisnin ‘Whey! Whey!’ dhe po ia hidhnin, ‘fshiji lotët, shok’, siç bëjmë zakonisht për të qenë të sinqertë, sidomos kur je kaq afër. Pastaj ai u kthye nga fusha dhe pati një përplasje me trajnerin. Kjo solli edhe një ‘Whey!’ tjetër, edhe më të fortë. Ai po kthehej gjatë gjithë kohës, ne e kishim nervozuar qartë. Pastaj Xhaka u kthye, sepse ishte ulur dy ose tre rreshta pas pankinës dhe mes nesh. Ai filloi t’i bërtiste njërit prej shokëve të mi që ishte ulur përpara, duke i thënë ‘tregoni respekt, tregoni respekt’ – gjë mjaft ironike duke pasur parasysh që [Mukiele] sapo ishte grindur me trajnerin e tij. Pastaj të gjithë filluan t’ia kthenin Xhakës, duke i thënë të qetësohej dhe të mbyllte gojën.”
Situata u përshkallëzua më tej pasi një tjetër person iu afrua Xhakës.
“Një djalë tjetër erdhi [drejt pankinës] për ta qetësuar situatën,” shtoi ky tifoz. “Pastaj Xhaka filloi ta sulmonte edhe atë – ai nuk po bënte asgjë, vetëm po i thoshte ‘ndalo, ndalo’ Xhakës. Dhe pastaj Xhaka filloi ta sfidonte duke i thënë: ‘Do të shihemi jashtë, do të shihemi jashtë’. Edhe kur po shkonte drejt tunelit pasi mbaroi ndeshja, ai vazhdonte t’i thoshte atij djalit: ‘Do të shihemi jashtë’. Gjithçka ishte nga Xhaka, një humbje totale kontrolli. Një tip që paguhet 100 mijë paund në javë dhe nervozohet nga njerëz krejt të zakonshëm, duke bërë të fortin kot. Ishte e gjitha faji i tij,” përfundoi tifozi./Klankosova.tv
