Drejtori i Përgjithshëm i Policisë së Kosovës, kolonel Gazmend Hoxha, së bashku me një delegacion, ka qëndruar nga 19 deri më 22 janar në San Antonio, Teksas, në kuadër të forcimit të bashkëpunimit profesional me Policinë e SHBA-së.
Vizita u zhvillua në Departamentin e Policisë së San Antonios (SAPD), me mbështetjen e ekipit DOJ-ICITAP të Ambasadës amerikane, dhe në kuadër të Memorandumit të Mirëkuptimit të nënshkruar në vitin 2021.
Gjatë vizitës u diskutuan praktika bashkëkohore të policimit të udhëhequr nga inteligjenca, lufta kundër krimit të organizuar, hetimet moderne, analizat e inteligjencës, operacionet e fshehta dhe menaxhimi policor.
Në takimet në nivel ekzekutiv u riafirmua angazhimi për forcimin e partneritetit dhe zhvillimin e aktiviteteve të përbashkëta në të ardhmen.
