Në kuadër të hulumtimeve për parregullsitë në sektorin privat të shëndetësisë, Veriu.info ka siguruar një raport inspektimi dhe një vendim të Inspektoratit të Ministrisë së Shëndetësisë me të cili “Supernova Healthcare L.L.C.” është gjobitur me 6 mijë euro për shkak të funksionimit pa licencë.
Në arsyetimin e vendimit të Inspektoratit Shëndetësor me numër 05-2094 të datës 0.12.2025 të siguruar nga Veriu.info, thuhet se në momentin e inspektimit është konstatuar se ky subjekt privat funksionon pa licencë institucionale për ushtrimin e veprimtarisë shëndetësore.
Tutje, në vendimin e Inspektoratit Shëndetësor thuhet se më 8 nëntor 2025 është parë një person i huaj që po kryente ekzaminim fizik të këmbës së pacientit të mitur dhe kishte përpara dokumentacionin shëndetësor të pacientit të cilin po e shqyrtonte.
Inspektorët Shëndetësorë kanë kërkuar “Supernova Healthcare L.L.C.”, që në rrjete sociale funksionon me “Dr. Supernova Kosova”, vendimin për ushtrimin e veprimtarisë profesionale për Veysel Antar, por i njëjti nuk iu është prezantuar.
“Dokumentet e paraqitura nga ana e z.Veysel Antar në formë eletronike në kohën e inspektimit, ishin vetëm në gjuhë të huaj (turke), pa përkthim, të pa noterizuara, duke pamundësuar verifikimin e tyre gjatë inspektimit. Ndërkohë, profesionisti i huaj po ushtronte ekzaminim fizik analizim të dokumentacionit shëndetësor dhe po jepte rekomandime mjekësore, duke vepruar pa autorizim ligjor. Gjatë inspektimit, në kompjuterin e subjektit u identifikua një listë e pacientëve, e cila u fotografua dhe u evidentua si provē dokumentuese. Pacientet ishin duke u trajtuar nga një profesionist pa autorizim ligjor, duke u ekspozuar ndaj mungesës së përgjegjësisë ligjore, mosinformim i mjaftueshëm mbi statusin e licencimit të profesionistit të huaj”, thuhet në arsyetimin e vendimit të inspektorëve shëndetësorë.
Bëhet e ditur se në përfundim të inspektimit, për shkak të ushtrimit të veprimtarisë shëndetësore pa licencë përkatëse institucionale dhe ushtrimit të veprimtarisë profesionale nga profesionisti i huaj pa autorizimin, subjektit i është vendosur shenja për ndërprerje të përkohshme të veprimtarisë, deri në plotësimin e të gjitha kerkesave ligjore dhe paraqitjen e dokumentacionit të vlefshëm siç e parasheh legjislacionin në fuqi në Republikën e Kosovës.
Gjatë muajit tetor dhe në fillim të muajit nëntor, “Dr. Supernova Kosova” kishte njoftuar se Dr. Veysel Antar vjen në Prishtinë me 8 nëntor, ku qytetarët mund të kenë mundësi për konsulta falas. Duke e parë se i njëjti doktor nuk ishte licencuar në Kosovë për ushtrim të veprimtarisë, Inspektorati Shëndetësor ka realizuar inspektim pikërisht me këtë datë në “Supernova Healthcare L.L.C.”, duke gjetur shkeljet e sipërpërmendura, që përfshijnë ushtrimin e aktivitetit shëndetësor pa licencë dhe nga ky subject privat dhe ushtrimin e profesionit mjekësor pa licencë të Kosovës nga Dr. Veysel Antar.
Ndryshe, sipas njoftimit të “Supernova Healthcare L.L.C.”, Dr. Veysel Antar është neurokirurgët turk që trajton tumoret e trurit, shtërngimet nervore të shpinës, çrregullimet e ecjes, e sëmundje të tjera.
Veriu.info i ka dërguar pyetje “Supernova Healthcare L.L.C.” në lidhje me këtë vendim prej disa ditësh, por deri në momentin e publikimit të artikullit nuk kemi marrë përgjigje. Sot, përmes telefonit menaxheri i “Supernova Healthcare L.L.C.”, Mejdi Sadiku ka thënë se e kanë paguar gjobën, por nuk ka dhënë detaje tjera.
