Në prag të zgjedhjeve presidenciale te FC Barcelona, kandidati Víctor Font ka ngjallur debat dhe shpresë te tifozët e klubit me deklaratat e tij për mundësinë e transferimit të yjeve të sulmit si Erling Haaland apo Julián Álvarez.
Gjatë një fjalimi në eventin e “Mundo Deportivo”, Font theksoi se gjiganti kataluans ka potencial për të nënshkruar me sulmuesit e mëdhenj, për sa kohë klubi menaxhohet si duhet dhe me një model të qëndrueshëm financiar dhe sportiv, përcjell “Gazeta Express”.
“Nëse gjërat bëhen si duhet, Haaland apo Julián Álvarez janë të mundshëm.”
Ai nënvizoi se ky objektiv nuk është një ëndërr e parealizueshme, por kërkon planifikim të mirë dhe një model menaxhimi të rregullt për ta arritur madhështinë sportive që tifozët presin.
Font i lidhi deklaratat e tij me nevojën për stabilitet institucional dhe një ndryshim të thellë në mënyrën e drejtimit të klubit, duke treguar se në zgjedhjet e 15 marsit ai synon ta shënojë një epokë të re në menaxhimin e Barcelonës, larg modelit tradicional presidencialist të viteve ’80.
Edhe pse Haaland është nën kontratë afatgjatë me Manchester Cityn dhe transferimet e lojtarëve të profileve të larta kërkojnë buxhet të konsiderueshëm, ideja e Fontit është që me planifikim të mirë këto transferime mund të jenë brenda mundësive të klubit në një të ardhme të afërt. /Gazeta Express
