Aksioni policor kundër fajdes, i zhvilluar më 2 mars në disa qytete të vendit, nga Prokuroria Themelore në Ferizaj, në koordinim me Drejtorinë për Hetimin e Krimeve të Rënda, kishte rezultuar me arrestimin e 15 personave të dyshuar për përfshirje në veprimtari kriminale. Në mesin e personave të arrestuar ishte edhe Egzon Salihu – bashkëpronar i auto-sallonit “Lipjani”.
Gati tri vjet pas këtij aksioni, Egzon (Xh) Salihut i është ngritur aktakuzë nga prokurori Rasim Maloku, nën dyshimin e kryerjes së veprës penale të fajdes.
Veriu.info ka siguruar aktakuzën e ngritur më 15 dhjetor 2025, ku emri i pronarit të auto-sallonit “Lipjani” është në mesin e shumë emrave të tjerë të akuzuar për dhënie të fajdes, shumica e të cilëve janë po ashtu pronarë të auto-salloneve.
Për çka akuzohet Egzon (Xh) Salihu?
Në aktakuzën që e posedon Veriu.info, thuhet se ekziston dyshimi i bazuar se, gjatë periudhës 2020–2022, në auto-sallonin e tij “Lipjani” ka kontraktuar shuma jo proporcionale të pasurisë, duke shfrytëzuar gjendjen e rëndë financiare të të dëmtuarit Xhevdet Shala – pronar i kompanisë “Golden”.
Sipas aktakuzës, i dëmtuari, për shkak të obligimeve që kishte ndaj personave të tjerë për fajde, është detyruar të blejë nga Egzon (Xh) Salihu një veturë “Tiguan” në vlerë 28 mijë euro, të cilën ia ka shitur prapë atij për 16 mijë euro, njëjtë siç ka vepruar edhe me një “Range Rover Sport” të blerë për 45 mijë euro, të cilën ia ka shitur me çmim prej 32 mijë euro.
Prokurori Rasim Maloku e ngarkon Egzon (Xh) Salihun edhe me një vepër të dyshuar të fajdes, për shkak se Xhevdet Shalës ia kishte shitur një veturë për 39 mijë euro, të cilën ia ka blerë pastaj për 28 mijë euro.
Aktakuza e ngritur më 15 dhjetor 2025 e ngarkon Egzon (Xh) Salihun edhe me një akuzë tjetër për fajde, pasi që dyshohet se, duke shfrytëzuar gjendjen e rëndë financiare për shkak të fajdes te personat e tjerë, i ka shitur Samir Bajramit – pronar i kompanisë “Ornela” – një “Porsche Panamera” për 100 mijë euro, të cilën menjëherë ia ka blerë për 60 mijë euro.
Me ‘stil’ të njëjtë të të bërit biznes, Egzon (Xh) Salihu dyshohet të ketë vepruar edhe kur i ka shitur edhe dy vetura të tjera Samir Bajramit, i cili me paratë e marra prej rreth 100 mijë euro ka paguar fajdet te të pandehurit e tjerë.
Çka i kishte sekuestruar policia Egzon (Xh) Salihut në aksionin e vitit 2023?
Veriu.info kishte raportuar ekskluzivisht asokohe se policia i kishte sekuestruar Egzon (Xh) Salihut këto prova dhe pasuri të pajustifikueshme:
-
Një (1) fletore me shënime
-
Dokumente të ndryshme noteriale (17 fleta)
-
Një (1) veturë AUDI A8
-
Një (1) veturë BMW X5
-
Një (1) telefon iPhone
Pse dhe si kishte ndodhur kjo shit-blerje e menjëhershme e veturave?
Veriu.info mëson se dyshimi i prokurorit bazohet në faktin se blerjet e veturave nga të dëmtuarit ndodhnin pa pasur ata para, duke hyrë në borxh te të pandehurit.
Ndërsa, rishitja e menjëhershme e veturave nga të dëmtuarit te të pandehurit ndodhte me kesh (para në dorë).
Sipas burimeve të Veriu.info, këtu ekziston dyshimi se të dëmtuarit as nuk i kanë prekur e as i kanë parë me sy veturat, pasi që ata kanë pasur nevojë për para e jo vetura. Pra, një X auto-sallon e ‘shiste’, për shembull, një veturë për 100 mijë euro, me çka i dëmtuari hynte në obligim financiar ligjor përmes noterit.
Ndërsa, blerësi (pronari i autosallonit) e ‘riblente’ me letra veturën që sapo e kishte shitur, për shembull për 70 mijë euro.
Faktikisht, këtu pronari i auto-sallonit i jepte 70 mijë (shifër ilustruese) euro kesh të dëmtuarit, ndërsa e ngarkonte me borxh prej 100 mijë euro (shifër ilustruese).
Pra, për 70 mijë euro të marra kesh, i dëmtuari detyrohej të kthente 100 mijë euro, këste për blerjen e X veturës.
Kjo, për prokurorin Rasim Maloku, ka paraqitur vepër penale të fajdes, për të cilën edhe ka ngritur aktakuzë ndaj 25 të pandehurve.
LEXONI EDHE:
