Gazetari Valon Syla ka reaguar lidhur me qëndrimin që Partia Demokratike e Kosovës po e mban ndaj disa kandidatëve të këtij subjekti, të cilët janë identifikuar si “hajna të votave” në procesin zgjedhor të 28 dhjetorit.
Ky reagim i Sylës për injorimin që PDK po i bën këtij skandali erdhi pasi sot deputeti, Nait Hasani, ka folur për nevojën e zgjedhjes së presidentit pa shkuar vendi në zgjedhje.
“Paska dalë Nait Hasani me fol për zgjedhjen dhe çështjen e Presidentit në Klan Kosova… me gjasë që po ka frikë me shku në zgjedhje, se e din që vështirë zgjedhet, pas skandalit të vjedhjeve të votave në Prizren. A paska harru që shokëve të tij të partisë ju kanë vjedh votat, e prej të vjedhurave ju rritën ‘pahiri’…”, ka shkruar ai.
Syla tutje ka deklaruar se PDK është duke i shpërfillur zotimet e dhëna publikisht se ata që kanë vjedhur vota brenda partisë do të ndëshkohen.
“PDK po ashtu po hesht për vjedhjet e votës brenda vetës. Pas fjalëve të mëdha se do të dënohen e do të dorëzohen mandatet e hajnave të votave brenda partisë, ajo çka po shohim është e kundërta. Hajnat e zgjedhjeve, apo ata që ju dolën disa vota tepër nga vjedhjet, momentalisht po flasin live në TV për çështje të mëdha. Por natyrisht jo për vjedhjet brenda tyre”, ka shtuar Syla.
