Ministri në detyrë i mbrojtjes së Iranit tha të hënën se vendi është i përgatitur për “çdo skenar” dhe paralajmëroi se çdo agresion ndaj tij do të rezultojë në një “përgjigje të ashpër dhe vendimtare”, sipas deklaratave të transmetuara në televizionin shtetëror iranian, shkruan CNN.
Gjenerali Majid Ibn Reza tha se forcat e armatosura të Iranit janë në “gatishmëri maksimale luftarake”, raportoi Press TV.
Presidenti i SHBA-së Donald Trump tha se marina amerikane do të fillojë bllokimin e porteve iraniane dhe do të “ndalojë” çdo anije që ka paguar tarifë ndaj Teheranit, pasi bisedimet e paqes mes dy vendeve dështuan gjatë fundjavës.
Veçmas, Ministria e Mbrojtjes së Iranit pretendoi se ka rezerva të konsiderueshme ushtarake, sipas komenteve të publikuara nga Young Journalists Club, një medium gjysmëzyrtar i lidhur me Gardën Revolucionare Islamike të Iranit (IRGC).
Zëdhënësi i Ministrisë së Mbrojtjes, Sardar Talaei-Nik, tha se “rezervat strategjike” të forcave të armatosura, përfshirë raketat dhe dronët, janë “të furnizuara mjaftueshëm dhe në mënyrë adekuate para luftës”, raportoi mediumi.
