Veriu.info më 10 prill kishte raportuar se si biznesi i fushës së estetikës ‘Quin with Rina Zaiti’ me pronare Albana Merlaku po ushtron ilegalisht veprimtari të ofrimit të shërbimeve shëndetësore.
Në këtë hulumtim kemi zbardhur skemën edhe të punës ilegale të një siriani me nënshtetësi turke, i cili ofron pa licencë shërbimeve shëndetësore të injektimit të fillerëve dhe botox-it, ku edhe vet Ministria e Shëndetësisë përmes përgjigjeve për Veriu.info ka konfirmuar se ‘Quin with Rina Zaiti’ dhe as siriani Muhammed Osman nuk kanë licencat e lartëpërmendura.
Pak minuta pas publikimit të artikullit Veriu.info përmes një mesazhi e ka njoftuar kryeinspektorin e Inspektoratit Shëndetësor, Labinot Zeqiri për publikimin e hulumtimit, pjesë e të cilit ishin edhe konfirmimet zyrtare të Ministrisë së Shëndetësisë për mungesë licence, por që i njëjti nuk kishte ndërmarrë veprime për inspektimin e kësaj qendre.
Në ditën e parë të punës pas publikimit të hulumtimit, Veriu.info i është drejtuar Ministrisë së Shëndetësisë me pyetje, ku në cc ka qenë edhe ministri Arben Vitia, se a është bërë inspektimi i subjektit të Albana Merkalut, por tek të premten (17 prill), kemi marrë një përgjigje nga zyra për informim e Ministrisë së Shëndetësisë, në të cilën thuhet: “Sipas informatave të pranuara nga ISh, gjatë javës së ardhshme planifikohet të realizohet një inspektim në bashkëpunim me organet e tjera kompetente, në institucinin në fjalë.”
Nga kjo përgjigje mund të konkludohet se inspektorati shëndetësor që udhëheqet nga kryeinspektori Labinot Zeqiri po e zvarrit inspektimin e ‘Quin with Rina Zaiti’, eventualisht deri sa e njëjta t’i rregullon dokumentacionet që i mungojnë.
Pra, në vend që të vepronte ‘ex officio’ pas publikimit të hulumtimit, inspektorati me në krye Labinot Zeqirin, nuk zvarrit këtë proces.
Burime të Veriu.info nga Ministria e Shëndetësisë bëjnë të ditur se qëllimi i zvarritjes është ndikimi që ka burri i Albana Merlakut, Rasim Merlaku në Inspektoratin Shëndetësor të udhëhequr nga Labinot Zeqiri.
Sipas të njëjtave burime, inspektorët shëndetësor nuk po kanë guxim të veprojnë ndaj biznesit të familjes Merlaku, e cila është njëra prej familjeve në të fuqishme në biznesin kosovar, duke qenë edhe ndërtues të lagjjes “Marigona Residence”.
Hulumtimi i Veriu.info:
