Nënkryetari i LDK-së, Lutfi Haziri, ka folur në emisionin “Pressing” në T7, ku është pyetur rreth rëndësisë së postit të presidentit, në kontekst të ofertës së sotme të Albin Kurtit për LDK-në, që përfshin katër ministri dhe postin e zëvendëskryeministrit.
Haziri tha se kryeministri Kurti më herët kishte deklaruar se nuk do të fliste për formim të qeverisë dhe kishte përjashtuar mundësinë e bashkëqeverisjes.
“Sepse para disa javësh z. Kurti ka thënë nuk flas për qeveri. E ka përjashtu bashkëqeverisjen, është përjashtu nga ai personalisht… Kur e ka formu qeverinë ka mujtë me thirrë LDK-në e me thanë hajde po bëjmë marrëveshje për qeverisje e në kontribut për presidentin,” tha Haziri.
Ai theksoi se oferta e Kurtit për bashkëqeverisje me LDK-në është e papranueshme, duke shtuar se në takimet e zhvilluara nuk është diskutuar fare për hyrje në qeveri.
