Ish-Presidenti Ilir Meta u arrestua me urdhër të SPAK pas një hetimi disa-vjeçar, ku ndaj tij dhe Monika Kryemadhit rëndojnë akuzat për korrupsion, pastrim parash dhe mosdeklarim pasurie.
Sipas SPAK, Meta dhe Kryemadhi dyshohet se pranuan premtimin për një vilë në kompleksin “Rolling Hills” nga biznesmeni Samir Mane, në këmbim të ndërhyrjeve politike dhe ligjore në favor të bizneseve të tij, veçanërisht për ndryshime në ligjin minerar dhe çështje që lidhen me AKEP-in dhe kompani private.
Në dosje përmenden edhe komunikime mes Monika Kryemadhit, Samir Manes dhe ish-deputetit Përparim Spahiu, ku sipas SPAK janë diskutuar amendime në ligjin minerar në interes të kompanisë Albchrome. Gjithashtu, rezultojnë biseda për ndërhyrje pranë institucioneve shtetërore lidhur me bizneset e Manes.
Në një tjetër komunikim të përgjuar, Kryemadhi informohej vazhdimisht për zhvillimet në AKEP dhe problematikat mes operatorëve telefonikë, ndërsa sipas SPAK kërkohej ndërhyrje për interesat e kompanisë Plus, ku Mane ishte aksioner.
Po ashtu, në biseda të tjera përmendet ndërhyrja e Ilir Metës, i referuar si “Shefi”, për të ndikuar në zgjidhjen e çështjeve që lidhen me tregun e telekomunikacionit dhe balancimin e interesave të operatorëve kryesorë në vend.
Një tjetër episod i përfshirë në dosje lidhet me komunikimet për vilën në Rolling Hills, ku Monika Kryemadhi dhe Samir Mane diskutojnë mbi pronën, ndërsa Meta në një mesazh përgjigjet: “Ok. Duhet dhe hamam e sauna”, detaj që SPAK e konsideron pjesë të provave mbi marrëdhënien korruptive.
Prokuroria thotë se edhe pse vila nuk u finalizua, vepra penale konsiderohet e konsumuar që në momentin e pranimit të premtimit. Çifti hoqi dorë pasi marrëveshja ishte mësuar nga persona të tjerë.
SPAK pretendon gjithashtu se Mane kishte blerë më herët një banesë në Qerret nga Meta dhe Kryemadhi për 300 mijë euro cash, shumë e padeklaruar sipas hetimit. Po ashtu përmenden udhëtime, dreka jashtë vendit dhe bileta koncerti si përfitime të tjera.
Meta e quajti arrestimin “rrëmbim politik” dhe deklaroi pafajësi. Kryemadhi mohoi akuzat, duke thënë se vila ishte menduar prej saj pa dijeninë e Metës. Samir Mane deklaroi se ndaj tij nuk ka akuzë penale dhe nuk komentoi më tej.
