Derisa me 20 janar, Autoriteti i Aviacionit Civil, Agjenci që mbikëqyret nga Zyra e Kryeministrit të Kosovës, njoftonte se kompania ajrore “GP Aviation” kryeson me numrin më të madh të udhëtarëve të shërbyer nga Prishtina, me 15 prill, pronari i kësaj kompanie, Ganesh Piga, po arrestohej në kufirin mes Maqedonisë së Veriut dhe Bullgarisë, pasi për të ekzistonte flet-arrest ndërkombëtar i lëshuar nga autoritetet gjermane.
Piga, siç raportojnë mediat ndërkombëtare, duke cituar autoritetet gjermane, kishte shkelur ligjin mbi 50 herë nga viti 2021 deri në vitin 2025 dhe akuzohet për shmangie tatimore prej 9 milionë eurosh.
Në kohën kur pronari i GP Aviaiton po vidhte shtetin gjerman, në Kosovë pikërisht kjo kompani po fitonte të drejtën ekskluzive për të mbajtur linjat ajrore.
Aviacioni Civil me 14 qershor njoftonte se Kompania GP Aviation e emëruar nga Republika e Kosovës po fillon fluturimet ndërmjet Kosovës dhe Zvicrës në tri destinacione.
Prishtinë – Cyrih, Prishtinë – Bazel dhe Prishtinë – Gjenevë.
Vendimi po i jepej kësaj kompanie për një periudhë tri vjeçare.
Për shqiptarët në Kosovë GP Aviation më shumë njihet si Prishtina Ticket, kompania që menaxhon me avionët e GP Aviation. Avionët e kësaj kompanie, 3 ose 4, kryejnë udhëtime vetëm në drejtim të Kosovës dhe shteteve ku ka shqiptarë në diasporë.
Pra, ndalja eventuale e fluturimeve për në Kosovë, nënkupton mos-funksionim të kompanisë.
Dhe ndihma prej 2 milionësh që e njoftoi Qeveria e Kosovës për t’i ndihmuar linjat ajrore nga diaspora për në Kosovë, nënkupton më saktësisht ndihmë për këtë kompani: Prishtina Ticket, e cila realizon shumicën dërrmues të fluturimeve për në Kosovë.
Dhe, njëjtë si pronari zviceran i GP Aviaiton, probleme me ligjin kanë edhe pronarët e Prishtina Ticket.
Nëse shikoni në ARBK pronar i kompanisë Prishtina Ticket del të jetë Arton Bajramaj dhe Prishtinaticket Scheiz AG.
Kurse, nëse kërkohet për këtë kompani në Zvicër, atëherë del se pronar i saj është Edvin Rrahmanaj.
Por, ka edhe një tjetër kompani të regjistruar në Kosovë me emrin Prishtina Air Ticket.
E këtu pronar është Bali Rrahmanaj, babai i Edvin Rrahmanaj dhe bashkëpunëtori i Arton Bajramaj.
Të dy këta, edhe Arton Bajramaj edhe Bali Rrahmanaj janë person që ishin ndaluar këtë vit nga autoritet e Kosovës nënë dyshime për “skemë të shpëlarjes së parave” që dyshohet se ka funksionuar në periudhën kohore nga viti 2015 deri në vitin 2019.
Sipas dyshimeve grupi kishte operuar përmes mashtrimeve me shitjen e avio-biletave për të kaluar më pas në pastrim parash.
VOX Kosova ka arritur të kuptojë se akoma nuk është ngritur aktakuzë ngaProkuroria Speciale për këtë çështj, por hetimet po vazhdojnë.
E pikërisht kjo kompani e udhëhequr nga një pronar i burgosur në Gjermani dhe të tjerë të ndalur në Kosovë, pritet të jetë përfituesi më i madh i skemës prej 2 milionëve të ndarë nga Qeveria e Kosovës.
Sepse, siç e thotë vetë agjencia e aviacionit civile ka më shumti fluturime drejt Kosovës dhe nga Kosova.
Është e çuditshme po ashtu se si agjencia e udhëhequr nga zyra e kryeministrit kishte zgjedhur pikërisht këtë kompani për t’ia dhënë linjat ajrore drejt Zvicrës e Gjermanisë.
Pra, 2 milionët e taksapaguesve të Kosovës nuk janë për ulje të çmimit të biletave për bashkatdhetarët, as për kujdes të shtuar për turizmin, por derdhje parash në xhepat e kësaj kompanie me pronarë që sistematikisht kanë probleme me ligjin në Kosovë.
Por, s’përfundon me kaq, lidhja shkon më tej.
Catering Prishtina është kompania e kateringut që furnizon me ushqim e gjithçka tjetër përfshire cigare, linjat ajrore të GP Aviation/Prishtina Ticket.
Dhe a e dini kush është pronar aty? Besnik Dalipi, djali i axhës së Luan Dalipit. Ish-Shefit të kabinetit të Albin Kurtit.
Pra nëse fluturimet anulohen GP Aviation mund të falimentojë plotësisht marrë parasysh borxhin 9 milionësh të kompanisë ndaj shtetit gjerman e i marren avionët, por këtu humbë shumë edhe Catering Prishtina e Dalipëve të Kurtit.
