Drejtori i Institutit KIPRED, Lulzim Peci, ka reaguar ashpër lidhur me vendimin për emërtimin e rrugëve në Mitrovicën e Veriut, duke e cilësuar atë si një veprim të Qeverisë në detyrë që bie ndesh me Ligjin për Vetëqeverisjen Lokale dhe kompetencat ekskluzive komunale.
Sipas Pecit, ky vendim përbën “abuzim të paskrupullt të kompetencave komunale” dhe nuk ka bazë të mjaftueshme ligjore, duke u ndërmarrë jashtë kornizës së përgjegjësive që i takojnë nivelit lokal të qeverisjes.
Ai ka vlerësuar se ky akt nuk është gjë tjetër veçse një përpjekje me karakter politik dhe elektoral, që sipas tij i shërben marketingut politik, por dëmton interesat strategjike të Kosovës.
Peci gjithashtu ka theksuar se veprime të tilla ndikojnë negativisht në rrugën e Kosovës drejt integrimit në Bashkimin Evropian, duke e paraqitur vendin si jo të përkushtuar ndaj sundimit të ligjit.
