Për shkak të krizës së naftës si pasojë e luftës së ShBA-së dhe Izraelit me Iranin, çmimi i derivateve të naftës ishte ngritur në gjithë botën, ku në Kosovë ishin vërejtur tendenca me abuzim të çmimeve nga kompanitë që merren me shitjen me shumicë dhe pakicë të këtyre derivateve, raporton Veriu.info
Për ta mbajtur situatën nën kontroll dhe për t’i mbrojtur konsumatorët, Ministria e Industrisë, Ndërmarrësisë dhe Tregtisë, duke u mbështetur në Ligjin për Tregtinë me Produkte të Naftës dhe Karburanteve të Ripërtëritshme, kishte vendosur që në baza ditore të caktojë çmimin maksimal të shitjes së derivateve të naftës.
Mirëpo, disa kompani nuk kishin zbatuar vendimin e Ministrisë së Industrisë, Ndërmarrësisë dhe Tregtisë, pasi që naftën e kishin shitur me çmime më të larta, duke shkelur ligjin dhe dëmtuar konsumatorët.
Veriu.info ka siguruar një dokument të Inspektoratit Qendror të Mbikëqyrjes së Tregut të Ministrisë së Industrisë, Ndërmarrësisë dhe Tregtisë, me të cilin është bërë kërkesë për fillimin e procedurës kundërvajtëse në Gjykatën Themelore në Prishtinë ndaj Petrol Company Sh.P.K., pasi që gjatë inspektimit të realizuar më 06.03.2026 është konstatuar se e ka tejkaluar marzhën tregtare maksimale të lejuar për shitje me pakicë dhe shumicë të derivateve të naftës.
Në këtë dokument bëhet e ditur se Petrol Company nuk e ka respektuar vendimin për rregullimin e çmimeve të caktuara nga Ministria e Industrisë, Ndërmarrësisë dhe Tregtisë.
Kjo gjendje e abuzimit me çmime të derivateve të naftës nga inspektorët e Inspektoratit Qendror të Mbikëqyrjes së Tregut është konstatuar me procesverbalin numër 000757/24 të datës 06.03.2026.
“Veprim ky në kundërshtim me nenin 15 të Ligjit nr.08/L-018 për Tregtinë me Produkte të Naftës dhe Karburanteve të Ripërtëritshme, i sanksionuar me nenin 19 paragrafi 13 të po të njëjtit ligj dhe në nenin 26 të Ligjit nr. 06/034 për Mbrojtjen e Konsumatorit dhe ndëshkohet me nenin 137 të po të njëjtit ligj”, thuhet në kërkesën e IQMT-së drejtuar gjykatës të siguruar nga Veriu.info.
Sanksionet e nenit 19, paragrafi 13
Për shkelje të vendimit për marzhën e fitimit maksimal, në kërkesë thuhet se sanksioni është paraparë me nenin 19, paragrafi 13 i Ligjit nr.08/L-018 për Tregtinë me Produkte të Naftës dhe Karburanteve të Ripërtëritshme.
Sipas paragrafit 13, dënimi maksimal për persona juridikë është i paraparë në shumën prej 6 mijë euro.
“Kushdo që, në kundërshtim me nenin 15 të këtij ligji, nuk respekton kufizimin e çmimit të produktit të naftës ose karburantit të ripërtëritshëm dënohet me gjobë prej dy mijë (2.000) deri në gjashtë mijë (6.000) euro, si person juridik”, thuhet në paragrafit 13 të nenit 19 të Ligjit nr.08/L-018.
Pse një kompani me dhjetëra njësi nëpër gjithë Kosovën të mos e shkelë këtë ligj, kur gjoba maksimale është paraparë 6 mijë? Përgjigje këtu mund të japin vetëm ligjvënësit dhe inspektorët e IQMT-së!
Kush është Petrol Company?
Kompania Petrol Company është e themeluar në vitin 2007 nga biznesmeni Shkëlzen Jusaj, i cili zotëron 100% të aksioneve në kompani.
Në media është raportuar se Petrol Company ka qenë donator i Vetëvendosjes në vitin 2019, ndërsa prej vitit 2021 deri më sot, kohë kur qeverisë Vetëvendosje, kjo kompani ka fituar tenderë publikë në vlerë prej rreth 51 milionë euro.
Veriu.info ka tentuar të marrë një qëndrim nga “Petrol Company” Sh.P.K për këtë çështje, por deri në momentin e publikimit të artikullit nuk ka pranuar përgjigje për pyetjet e dërguara.
