Një qytetare ka dorëzuar në Stacionin Policor në Viti një portofol të gjetur, i cili përmbante dokumente personale, karta bankare dhe një shumë parash.
Sipas njoftimit të Policisë së Kosovës, rasti ka ndodhur më 12 qershor 2026, kur qytetarja ka raportuar gjetjen e portofolit dhe e ka dorëzuar atë tek autoritetet policore.
Pas pranimit të portofolit, njësitë policore kanë ndërmarrë veprimet e nevojshme operative dhe, pas verifikimeve, kanë arritur të identifikojnë pronarin legjitim.
Portofoli me të gjitha sendet e humbura i është kthyer pronarit përkatës.
Drejtoria Rajonale e Policisë në Gjilan ka falënderuar qytetaren për veprimin, duke theksuar se raste të tilla dëshmojnë bashkëpunimin e ngushtë ndërmjet qytetarëve dhe policisë si një element i rëndësishëm për sigurinë në komunitet.
