Ish-kryediplomati i Kosovës, Petrit Selimi, ka folur për marrëdhëniet mes Kosovës dhe ShBA-së, duke ngritur shqetësimin se kurrë më parë këto marrëdhënie nuk kanë qenë në nivel kaq të ulët.
Ai shtoi se e vërteta mbi marrëdhëniet Kosovë–ShBA është brutale.
Selimi theksoi faktin se Kosova ende nuk ka një ambasador amerikan, ndryshe nga vendet e tjera të Ballkanit.
Gjithashtu, ai përmendi editorialin e ushtrueses së detyrës së ambasadores së ShBA-së, ku theksohet nevoja emergjente që Kosova t’i bashkohet projektit amerikan për gazin natyror në Ballkan, përndryshe “treni po ikën”.
“Marrëdhëniet mes Kosovës dhe SHBA-së kurrë në historinë moderne të Kosovës nuk kanë qenë në pikën më të ulët. Ne mund ta zbukurojmë, ne mund të pretendojmë diçka tjetër, por e vërteta është brutale. Kosova është ende në procesin ku i është suspenduar dialogu për marrëveshje strategjike. SHBA-të kanë dërguar ambasadorë në shumë shtete të tjera në Ballkan, por jo në Kosovë. Ambasadorja amerikane apo ushtruesja e detyrës, pak ditë para zgjedhjeve, del me një mesazh të qartë, një editorial ku thotë se Kosovës po i ikën treni në investimet energjetike amerikane në Ballkan. Pra, kemi mesazhe pas mesazhesh nga qeveria amerikane që nuk jeni në rrugë të mirë dhe Kosova nuk është në rrugë të mirë. Është shumë me rëndësi të mos e mashtrojmë vetveten, dhe kjo nuk është rezultat vetëm i ngjarjeve në Amerikë, por edhe i sjelljeve tona në Kosovë”, tha ai për EO.
Duhet theksuar se Prattipati, përmes një editoriali, i ka bërë thirrje Kosovës që t’i bashkohet projekteve amerikane të gazit natyror të planifikuara nëpër Ballkan për të siguruar të ardhmen e saj energjetike. Ajo ka vlerësuar se Kosova duhet të veprojë shpejt për të shfrytëzuar këtë mundësi, duke theksuar se afati po mbaron./Nacionale
