Boksieri shqiptar Kristian Prenga sonte do të përballet me britanikun Anthony Joshua, në një duel që pritet të jetë ndër ndeshjet e boksit më të mëdha të vitit.
Përballja mes Prengës dhe ish-kampionit të botës në peshat e rënda do të zhvillohet në “Jeddah Superdome” në të Arabisë Saudite.
Programi kryesor i mbrëmjes së boksit pritet të nisë rreth orës 19:00 sipas kohës tonë, ndërsa dueli kryesor mes Joshuas dhe Prengës pritet të zhvillohet rreth orës 23:30.
Ish-kampioni i botës në peshat e rënda rezultoi me 113.9 kilogramë, ndërsa Prenga ishte më i rëndë në peshore, duke regjistruar 118.6 kilogramë.
Për Joshuan, kjo është një ndeshje shumë e rëndësishme, pasi rikthehet në ring pas një periudhe mungese dhe synon ta nisë me fitore një kapitull të ri në karrierën e tij.
Britaniku konsiderohet favorit absolut për këtë përballje falë përvojës së madhe dhe rekordeve të tij në boksin profesionist. Ai ka qenë dy herë kampion bote në kategorinë e peshave të rënda dhe synon të rikthehet në nivelin më të lartë të këtij sporti.
Në anën tjetër, Kristian Prenga do të ketë sfidën më të madhe të karrierës. Boksieri shqiptar do të përballet për herë të parë me një emër të përmasave të Joshuas dhe një rezultat pozitiv do të ishte një sukses historik për të.
Fituesi i këtij dueli pritet të afrohet edhe më shumë me përballjet e mëdha në kategorinë e peshave të rënda, ndërsa për Joshuan vazhdon të përflitet një superduel me Tyson Fury, nëse arrin të kalojë me sukses këtë sfidë.
