Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një klinikë stomatologjike në Prishtinë që është gjobitur nga Inspektorati Shëndetësor.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Albadent” Sh.P.K. me themelues Dr. Blerim Mehmeti është gjobitur me 3 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e “Albadent” thuhet se në kohën e inspektimit është konstatuar se ky institucion privat shëndetësor është në kuadër të hapësirave të Kolegjit AAB dhe se ka qasje të përbashkët dhe shfrytëzohen hapësirat e njëjta me një Galeri të Arteve.
“Sipas Dr. Blerim Mehmeti themelues i IPSh “Albadent Sh.P.K” posedojnë një marrëveshje me Kolegjin e AAB që në këtë Poliklinikë Stomatologjike të kryhen të gjitha praktikat klinike të studentëve të stomatologjisë, përfshirë atë para-klinike dhe atyre klinike. Neni 5 i kësaj kontrate paragrafi 6 thotë “Praktikat profesionale para-klinike dhe klinike për studentët e stomatologjisë do të organizohen dhe ofrohen nga stafi akademik dhe mjekët me specialistë të Kolegjit AAB”, thuhet në arsyetimin e vendimit, por duke theksuar faktin se “Albadent” Sh.PK. është e licencuar si Poliklinikë stomatologjike me tre veprimtari, e jo si institucion akademik.
Si gjetje tjetër inspektorët shëndetësorë kishin evidentuar edhe kartonët e pacientëve, të cilët përmbanin dy logo, të Albadent dhe AAB-së.
“Udhëzimi Administrativ me nr. 02/2025 KUSHTET DHE PROCEDURAT PËR USHTRIMIN E VEPRIMTARISË SHËNDETËSORE NË INSTITUCIONET PRIVATE neni 18 paragrafi 1 nën paragrafi 1.24 cek që Hapësirat e institucionit shëndetësor shfrytëzohen vetëm për ofrimin e shërbimeve shëndetësore”, thuhet tutje në arsyetimin e vendimit për shqiptimin e gjobës.
Për shkak të këtyre gjetjeve, Inspektorati Shëndetësor në fund të inspektimit e ka ndaluar përkohësisht veprimtarinë e klinikës “Albadent”, duke e vendosur edhe shenjën për ndalim të përkohshëm.
Por me këtë vendim të inspektorëve nuk është pajtuar “Albadent” e Blerim Mehmeti, duke refuzuar nënshkrimin e procesverbalit të inspektimit.
Veriu.info ka tentuar të marrë një qëndrim nga “Albadent” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
