Dogana e Kosovës edhe pse është institucion vital shtetëror, duket se punon me standarde të dyfishta. Kjo pasi që për raste të njëjta të dyshimeve për keqpërdorim të detyrës zyrtare, ka marrë vendime të ndryshe. Pra, për dikë është treguar “nënë” për dikë “njerkë”.
Veriu.info ka trajtuar rastet e dy punonjësve që dyshohen për keqpërdorim të detyrës zyrtare, ku njërin Dogana e ka kthyer në punë, ndërsa tjetrit i ka shkëputur kontratën e punës. Fjala është për zyrtarin Arton Lushaku, për të cilin nuk ishte pritur asnjë vendim nga Prokuroria për t’u rikthyer në detyrë, ndaj zyrtarit E.K. u mor masë e menjëhershme e shkëputjes së kontratës pa pritur vendimin e gjykatës.
Dogana e Kosovës ka zgjedhur të mos i përgjigjet pyetjeve zyrtare të Veriu.info lidhur me dyshimet për zbatimin e masave disiplinore me dy standarde nga drejtuesi i saj, Agron Llugaliu.
Rasti i Arton Lushakut: Rikthimi në punë pa një vendim nga Prokuroria
Veriu.info ka raportuar edhe më parë lidhur me rastin e zyrtarit të Doganës, Arton Lushaku. Ndaj tij ishin ngritur dyshime për përfshirje në kalimin e papaguar apo të kundërligjshëm të mallrave me një vlerë prej rreth 20 mijë eurosh — një shkelje kjo me peshë të rëndë financiare dhe institucionale.
Pavarësisht rëndësisë së rastit dhe faktit se procedura hetimore në prokurorinë kompetente nuk ka marrë ende një epilog përfundimtar, menaxhmenti i Doganës kishte vendosur ta pezullonte përkohësisht procedurën disiplinore dhe ta kthente Lushakun përsëri në punë.
Ajo që e bën edhe më problematike këtë situatë është dyshimi se Lushaku mund të jetë rikthyer në të njëjtat pozita të ndjeshme të kontrollit doganor ku pretendohet se ka ndodhur shkelja fillestare. Rikthimi i tij në detyrë pa një arsyetim të qartë publik dhe pa pritur vendimin përfundimtar të organit të ndjekjes ka nxitur reagime dhe dyshime brenda vetë institucionit për mbrojtje dhe favorizim të tij.
Zyrtari E.K. u shkarkua menjëherë për 18 mijë euro mall
Në anën tjetër, praktika e ndjekur me zyrtarin tjetër, E.K. (emër i njohur për redaksinë — Veriu.info e ka anonimizuar pasi që ai tashmë nuk është më punonjës i Doganës), tregon një qasje krejtësisht tjetër të drejtorit Llugaliu.
Në fillim të këtij viti, E.K. u përball me një dyshim pothuajse të njëjtë me atë të Lushakut — lejimin e kalimit të mallit të papaguar në vlerë prej 18 mijë eurosh. Mirëpo, për dallim nga rasti i Lushakut, menaxhmenti i Doganës nuk tregoi të njëjtin mirëkuptim. Për E.K. nuk u prit as përfundimi i hetimeve nga organet e drejtësisë e as ndonjë vendim i formës së prerë nga gjykata për të vërtetuar fajësinë apo pafajësinë e tij. Ndaj tij u mor menjëherë masa më e rëndë disiplinore: shkëputja e menjëhershme e kontratës së punës.
Pyetjet që mbetën pa përgjigje
Lidhur me këtë diferencim të dukshëm, Veriu.info i ka dërguar kërkesë zyrtare drejtorit të Doganës, Agron Llugaliu, duke kërkuar përgjigje në këto pyetje:
Cili ishte kriteri ligjor dhe profesional që përcaktoi largimin e menjëhershëm nga puna të E.K. pa pritur vendimin e gjykatës, ndërsa mundësoi rikthimin e Arton Lushakut pa pasur një vendim nga Prokuroria?
A është rikthyer Arton Lushaku në të njëjtën pozitë kontrolli doganor ku pretendohet se u krye shkelja?
A ka pasur ndikime personale, miqësi apo presione nga jashtë që ndikuan në shpëtimin e z. Lushaku nga shkarkimi?
Kërkesë për qasje në dokumentet zyrtare: vendimin për shkëputjen e kontratës së E.K. dhe vendimin për rikthimin e Lushakut.
Deri në momentin e publikimit të këtij artikulli, Dogana e Kosovës nuk ka kthyer asnjë përgjigje. Heshtja e institucionit shton dyshimet e ngritura se masat disiplinore brenda Doganës nuk merren mbi bazën e rregullave të barabarta për të gjithë, por varen nga preferencat e menaxhmentit
