Është një pyetje që Presidenti Donald Trump ua ka bërë privatisht prej muajsh ekipit të tij të sigurisë kombëtare: Pse populli iranian nuk po i rrëzon udhëheqësit e tij?
Ishte një rezultat për të cilin ai dukej relativisht i sigurt në fillim të luftës, i bindur nga kryeministri izraelit Benjamin Netanyahu se protestat në rrugë do të shpërthenin në Teheran pas një raundi intensiv sulmesh.
Zyrtarë të tjerë amerikanë, pasi kishin lexuar vlerësime të inteligjencës që sugjeronin se kjo nuk kishte gjasa të ndodhte, nuk ishin aq të bindur dhe çështja u debatua ashpër përpara se të fillonin sulmet e para, sipas personave të njohur me çështjen. Megjithatë, Trump e nisi konfliktin në fund të shkurtit me një thirrje për marrjen e pushtetit nga një qeveri tjetër.
“Ky ndoshta do të jetë shansi juaj i vetëm për breza të tërë”, u tha ai popullit iranian në një video natën kur filloi lufta.
Ideja u zbeh shpejt, duke u zëvendësuar nga nevoja më urgjente për të negociuar me regjimin për rihapjen e Ngushticës së Hormuzit. Deri në qershor, Trump këmbënguli se ai “nuk ishte interesuar kurrë për ndryshimin e regjimit” në Iran, duke pretenduar se ishte në negociata me “njerëz shumë racionalë” dhe se përpjekjet amerikane për rrëzimin e qeverive të huaja “nuk funksionojnë kurrë”.
Pavarësisht këtyre komenteve, Trump vazhdoi të pyeste veten pse thirrjet e tij për rrëzimin e qeverisë nuk po merreshin parasysh, thanë personat e njohur me çështjen.
Tani, me trafikun përmes ngushticës ende nën nivelet e para luftës dhe diplomacinë me Iranin në një pikë bllokimi, Trump i është rikthyer konceptit me të cilin e nisi luftën gjashtë muaj më parë, shkruan CNN.
“Kur do të ngrihet populli iranian dhe do të luftojë?”, pyeti ai në rrjetet sociale të martën.
