Në Parlamentin Europian ka nisur debati për varrimin e kriminelit të luftës Ratko Mlladiqit dhe glorifikimin e krimeve të luftës në Serbi, të cilin e hapi komisionerja europiane për Zgjerimin, Marta Kos, duke thënë se ngjarjet e javës së kaluar i rikujtuan asaj se sa e vështirë është përballja me një nga kapitujt më të errët të historisë së afërt europiane dhe vuajtjet e mëdha të shkaktuara nga luftërat në ish-Jugosllavi.
“BE-ja është në solidaritet me të gjitha viktimat e krimeve të luftës, të mbijetuarit dhe familjet e tyre. Stabiliteti dhe përparimi në Ballkanin Perëndimor janë në interesin strategjik të Europës. Serbia ka një rol qendror dhe përgjegjësi në këtë drejtim”, tha Kos.
Ajo theksoi se Serbia, duke aplikuar për anëtarësim në BE, është zotuar të respektojë vlerat dhe parimet europiane. Ajo shtoi se Komisioni Europian ka bërë të qartë se glorifikimi i kriminelëve të luftës dhe mohimi i gjenocidit janë të papajtueshme me vlerat europiane dhe se për to nuk ka vend në BE.
Kos iu referua edhe vizitës së saj në Srebrenicë vitin e kaluar, duke thënë se është e pakuptueshme që dikush përgjegjës për krime të tilla të glorifikohet si hero, shkruan Danas.
“Pamjet nga varrimi i Ratko Mlladiqit ishin jashtëzakonisht shqetësuese. Ato tregojnë dështimin për t’u përballur me të kaluarën dhe bien ndesh me vlerat që qëndrojnë në themel të integrimit europian. Veçanërisht shqetësuese ishte të shihje ministra, zyrtarë dhe përfaqësues të ushtrisë serbe, së bashku me liderë dhe politikanë të Republikës Srpska, duke marrë pjesë në varrim dhe duke nderuar një kriminel lufte. Komisioni Europian u bën thirrje autoriteteve serbe dhe të gjithë aktorëve në rajon që të kontribuojnë në pajtimin dhe marrëdhëniet e mira fqinjësore”, tha Marta Kos.
Megjithatë, Kos theksoi se pamjet që u panë nuk përfaqësojnë shoqërinë serbe në tërësi.
“Shumë qytetarë nga Serbia dhe rajoni më kanë shkruar, duke e kundërshtuar glorifikimin e kriminelëve të luftës. Prandaj e di se Serbia është më shumë se kaq. Serbia janë qytetarët e saj, të rinjtë, sipërmarrësit, nëpunësit, artistët dhe gazetarët që duan që vendi i tyre të ecë përpara, që duan të jetojnë në një Serbi të lirë, demokratike dhe europiane. Ajo Serbi meriton të dëgjohet dhe meriton mbështetje dhe për të ka vend në Evropë”, deklaroi Kos.
Ajo tha se dinjiteti i viktimave të gjenocidit dhe krimeve të luftës nuk mund të negociohet dhe se Europa nuk do t’i kërkojë kurrë Serbisë të mohojë identitetin dhe historinë e saj, por do t’i kërkojë një përballje të sinqertë me të kaluarën.
“Komisioni do të bëjë gjithçka që është në fuqinë e tij për të mbështetur rrugën europiane të Serbisë”, përfundoi Kos./REL/
