Ministri i Punëve të Jashtme i Shqipërisë, Ferit Hoxha, ka reaguar ndaj deklaratës së Ivica Daçiqit, i cili gjatë fushatës elektorale tha se “në një moment flamuri serb do të valvitet mbi Prizren”.
Hoxha, nëpërmjet një postimi në X ka kritikuar gjuhën e ish-kryediplomatit serb, që tha se mund t’u japë zemër personave të gatshëm të veprojnë në përputhje me deklarata të tilla. Ai ka përmendur edhe sulmin në Banjskë të Zveçanit, duke theksuar se llogaridhënia e plotë ende mungon.
Hoxha ka ritheksuar mbështetjen e Shqipërisë për Kosovën, si dhe ka bërë thirrje për marrëdhënie të mira fqinjësore, bashkëpunim rajonal dhe pajtim.
Reagimi i plotë i Ferit Hoxhës:
Një ministër serb, gjatë fushatës, i premtoi audiencës së tij se ‘do ta ngrinte sërish flamurin e tyre’ në Kosovë.
Një gjuhë e tillë nxitëse mund të shpërfillej si retorikë politike, po të mos ekzistonte rreziku shumë real që ajo t’u jepte zemër atyre që janë të gatshëm të veprojnë në përputhje me të. Këtë e kemi parë edhe më parë, tepër shumë herë. Banjska, ku llogaridhënia e plotë ende mungon, qëndron si një kujtesë e qartë e asaj që mund të ndodhë kur fjalët shndërrohen në veprime.
Shqipëria mbetet e bindur fort se e vetmja rrugë përpara, sado e vështirë të jetë, qëndron te marrëdhëniet e fqinjësisë së mirë, bashkëpunimi rajonal dhe përpjekjet e sinqerta për të shëruar plagët e së kaluarës dhe për të ecur drejt pajtimit.
Por nuk mund të ketë bashkëpunim të qëndrueshëm rajonal përderisa realitetet mohohen, vihet në pikëpyetje legjitimiteti i fqinjëve ose përdoret retorika kërcënuese për përfitime politike.
Ndërtimi i paqes dhe besimit kërkon kohë, shpesh vite, nëse jo dekada. Ai kërkon vizion, guxim, vendosmëri dhe përkushtim të vazhdueshëm.
Europa u ndërtua pikërisht mbi njohjen, dialogun, respektin e ndërsjellë dhe solidaritetin, e jo mbi mohimin, frikësimin apo nostalgjinë për të kaluarën.
Në Ballkanin Perëndimor, e dimë shumë mirë se ku mund të çojnë përçarja, nacionalizmi dhe retorika nxitëse. Nuk mund të lejojmë t’i harrojmë këto mësime, e aq më pak t’i përsërisim ato.
Republika e Kosovës është një realitet i pakthyeshëm. Ajo është një shtet sovran dhe demokratik, pjesë e barabartë e rajonit tonë dhe një vend që po e konsolidon vazhdimisht vendin e vet në komunitetin evropian dhe ndërkombëtar. Ajo është shtëpi për të gjithë qytetarët e saj, pavarësisht përkatësisë etnike, dhe e ardhmja e saj duhet të jetë një e ardhme paqeje, sigurie, gjithëpërfshirjeje dhe integrimi evropian.
Shqipëria ka qëndruar përkrah Kosovës dhe do të vazhdojë ta mbështesë atë në çdo mënyrë të mundshme.
Ne e shohim këtë jo vetëm si një përkushtim të rrënjosur në lidhjet tona të ngushta, por edhe si një investim strategjik në të ardhmen tonë të përbashkët europiane dhe në paqen, sigurinë dhe prosperitetin e të gjithë rajonit.
