Ekonomia e Kosovës pritet të shënojë rritje prej 3,5 për qind gjatë vitit 2026, ndërsa inflacioni parashikohet të rritet në 6,8 për qind, sipas parashikimeve të Fondit Monetar Ndërkombëtar (FMN), të publikuara në raportin e tetorit World Economic Outlook.
Sipas raportit, rritja ekonomike e Kosovës pritet të ngadalësohet nga 3,6 për qind sa ishte në vitin 2025, në 3,5 për qind më 2026. Për vitin 2027, FMN-ja parashikon një rritje prej 3,6 për qind.
Në të njëjtën kohë, inflacioni pritet të përshpejtohet ndjeshëm. Pasi ishte 3,9 për qind në vitin 2025, ai parashikohet të arrijë në 6,8 për qind më 2026, përpara se të bjerë në 4,5 për qind në vitin 2027.
Raporti i FMN-së parashikon gjithashtu zgjerimin e deficitit të llogarisë rrjedhëse, nga 8,3 për qind e Bruto Produktit Vendor (BPV) më 2025, në 9,3 për qind më 2026. Për vitin 2027, ky deficit pritet të jetë 8,9 për qind e BPV-së.
Të dhënat tregojnë se Kosova do të përballet me një kombinim të rritjes së ngadalësuar ekonomike dhe inflacionit më të lartë gjatë vitit 2026, ndërsa përmirësimi i parashikuar për vitin e ardhshëm mbetet i pjesshëm.
Rritja ekonomike e Kosovës parashikohet 3.5 për qind
Sa i përket zhvillimit ekonomik, FMN parashikon që ekonomia e Kosovës të rritet me 3.5 për qind gjatë vitit 2026, nga 3.6 për qind sa vlerësohet për vitin 2025.
Kjo paraqet një ngadalësim të lehtë të aktivitetit ekonomik, prej 0.1 pikë përqindjeje, ndërsa për vitin 2027 parashikohet rikthimi i rritjes ekonomike në 3.6 për qind.
Në krahasim me vendet e Ballkanit Perëndimor, Kosova pritet të ketë të njëjtën normë të rritjes ekonomike me Shqipërinë dhe Maqedoninë e Veriut, të cilat gjithashtu parashikohet të shënojnë rritje prej 3.5 për qind gjatë vitit 2026.
Ndërkohë, ekonomia e Serbisë parashikohet të rritet me 3.3 për qind, ajo e Malit të Zi me 3 për qind, ndërsa Bosnja dhe Hercegovina pritet të ketë rritjen më të ulët ekonomike në rajon, prej 2.3 për qind.
Këto të dhëna tregojnë se, ndonëse Kosova parashikohet të jetë ndër ekonomitë me rritjen më të lartë në Ballkanin Perëndimor, ajo njëkohësisht pritet të përballet me inflacion dukshëm më të lartë se vendet e tjera të rajonit.
Parashikimet për vitin 2027
Për vitin 2027, FMN parashikon që rritja ekonomike e Kosovës të arrijë në 3.6 për qind, ndërsa inflacioni të ngadalësohet në 4.5 për qind.
Në të njëjtën periudhë, Serbia parashikohet të ketë rritje ekonomike prej 4 për qind, Shqipëria dhe Maqedonia e Veriut nga 3.2 për qind, Mali i Zi 2.8 për qind dhe Bosnja dhe Hercegovina 2.6 për qind.
Në aspektin e inflacionit, për vitin 2027 Kosova dhe Maqedonia e Veriut parashikohen të kenë norma prej 4.5 për qind, Serbia 4.2 për qind, Mali i Zi dhe Bosnja e Hercegovina nga 3.3 për qind, ndërsa Shqipëria 3.2 për qind.
Të dhënat e FMN-së tregojnë se sfida kryesore për ekonominë e Kosovës gjatë vitit 2026 pritet të jetë përshpejtimi i inflacionit, në një periudhë kur rritja ekonomike parashikohet të mbetet relativisht e qëndrueshme.
