Detaje të rënda janë zbuluar lidhur me tragjedinë në fshatin Demiraj të Gjilanit, ku në një shtëpi janë gjetur të vdekur një 27-vjeçar dhe foshnja e tij rreth tre muajshe.
Sipas informacioneve të siguruara nga Reporteri, dyshohet se fillimisht 27-vjeçari e ka privuar nga jeta foshnjën e tij tre muajshe. Më pas, babai i tij dyshohet se e ka mbytur të birin.
Sipas burimeve të mediumit, 27-vjeçari dyshohet se është mbytur me litar nga babai i tij, i cili dyshohet se ka ndërhyrë në përpjekje për ta mbrojtur foshnjën.
Rrethanat e plota të kësaj ngjarjeje tragjike ende nuk janë bërë të ditura, ndërsa mbetet të konfirmohen zyrtarisht detajet nga organet kompetente.
Sipas njoftimit të Policisë, më 1 nëntor 2026, rreth orës 08:47, është pranuar informacioni për dy trupa të pajetë në një shtëpi në këtë fshat. Viktimat janë një person i gjinisë mashkullore, i lindur në vitin 1999, dhe një foshnjë.
Nga hetimet e para në vendin e ngjarjes, Policia dyshon se rasti ka ndodhur brenda familjes. Në cilësinë e të dyshuarit është arrestuar babai i viktimës, 65-vjeçar, i cili me vendim të prokurorit është ndaluar për 48 orë
Në vendin e ngjarjes kanë dalë njësitet përkatëse policore, Prokurori i Shtetit dhe ekipi emergjent mjekësor, ku mjeku kujdestar ka konstatuar vdekjen e të dy personave.
Me vendim të Prokurorit të Shtetit, trupat e pajetë janë dërguar në Institutin e Mjekësisë Ligjore në Prishtinë për obduksion.
Rasti është cilësuar si “Vrasje e rëndë”, ndërsa Policia dhe Prokuroria janë duke ndërmarrë veprimet e nevojshme hetimore për zbardhjen e plotë të rrethanave të kësaj ngjarjeje.
