Tragjedia në Gjilan: Krejt çka dihet për vrasjen e 27-vjeçarit dhe foshnjës tre muajshe
Lajme
Gazeta Express 02/11/2026 6:59
Policia e Kosovës ka dhënë detaje të reja për ngjarjen e rëndë në fshatin Demiraj të Gjilanit, ku më 1 nëntor u gjetën të vdekur një 27-vjeçar dhe një foshnjë tre muajshe.
Nga hetimet e para, dyshohet se ngjarja ka ndodhur brenda familjes, ndërsa si i dyshuar për këtë rast është arrestuar babai i 27-vjeçarit, 65-vjeçar.
Rasti është cilësuar si “Vrasje e rëndë”, ndërsa hetimet për zbardhjen e plotë të rrethanave janë duke vazhduar.
Si ndodhi ngjarja?
Policia bëri të ditur se më 1 nëntor 2026, rreth orës 08:47, kishte pranuar informacion për dy persona që dyshohej se ndodheshin pa shenja jete në një shtëpi në fshatin Demiraj të Gjilanit.
Pas pranimit të informacionit, në vendin e ngjarjes kanë dalë njësitet policore, Prokurori i Shtetit dhe ekipi emergjent mjekësor.
Pas ekzaminimit në vendin e ngjarjes, është konstatuar vdekja e dy personave.
Viktimat janë identifikuar si një 27-vjeçar dhe një foshnjë tre muajshe.
Babai 65-vjeçar arrestohet si i dyshuar
Zëdhënësi i Policisë për rajonin e Gjilanit, Ismet Hashani, ka konfirmuar se nga hetimet e para dyshohet që ngjarja të ketë ndodhur brenda familjes.
Në lidhje me rastin është arrestuar babai i 27-vjeçarit, 65-vjeçar.
“Me vendim të prokurorit, i dyshuari është ndaluar për 48 orë”, bëhet e ditur në njoftimin e Policisë.
Autoritetet nuk kanë dhënë detaje të tjera për motivin e dyshuar apo mënyrën se si janë shkaktuar vdekjet.
Trupat dërgohen për obduksion
Me vendim të Prokurorit të Shtetit, trupat e pajetë të 27-vjeçarit dhe foshnjës tre muajshe janë dërguar në Institutin e Mjekësisë Ligjore në Prishtinë për obduksion.
Obduksioni pritet të ndihmojë në përcaktimin e shkakut të vdekjes së të dy viktimave.
Policia, në bashkëpunim me Prokurorinë, po vazhdon hetimet për të sqaruar rrethanat e plota të ngjarjes.
Kryetari i Gjilanit shpreh ngushëllime
Kryetari i Komunës së Gjilanit, Alban Hyseni, ka shprehur ngushëllime për familjarët e dy personave që humbën jetën në Demiraj.
Në reagimin e tij, Hyseni ka thënë se lajmi për humbjen e dy jetëve e ka tronditur komunën.
Ai ka shprehur dhimbjen me familjarët dhe të afërmit e viktimave, duke kërkuar që organet e rendit dhe të drejtësisë të angazhohen për zbardhjen e plotë të rrethanave.
“Presim që organet e rendit dhe të drejtësisë që të bëjnë punën e tyre me përkushtim të plotë për zbardhjen e të gjitha rrethanave të këtij rasti”, ka deklaruar Hyseni.
