Dikur thoshin se familjarët janë vetëm për dasma e ahengje, por sot, kur kanë hipur në pushtet, veprimet po u dalin krejt ndryshe.
Në një konkurs publik të shpallur nga Administrata Tatimore e Kosovës (ATK), Gresa Ramanaj, bashkëshortja e Rejhan Fejzës, vëllait të deputetes së Vetëvendosjes, Arjeta Fejza, është shpallur kandidate fituese për pozitën Zyrtare për Recepsion në rajonin e Mitrovicës, duke siguruar plot 96 pikë.
Veriu.info ka siguruar dokumentin ku shihet se Gresa Ramanaj është shpallur fituese e këtij konkursi.

Megjithatë, ajo që kërkon sqarim është mënyra se si është zhvilluar procesi i përzgjedhjes, duke pasur parasysh se, sipas informacioneve të siguruara nga mediumi jonë, për këtë pozitë kishin aplikuar kandidatë të shumtë.
Duket se fjalia e dikurshme e Vetëvendosjes, se familjarët janë vetëm për dasma e ahengje, po tingëllon ndryshe tash kur bëhet fjalë për njerëzit e afërt të pushtetit.

Rasti i punësimit të bashkëshortes së Rejhan Fejzës ngre pikëpyetje për mënyrën se si po zhvillohen konkurset publike dhe meritokracinë që dikur ishte një nga premtimet kryesore të kësaj partie.
Ndërkaq, vëllai i deputetes së Lëvizjes Vetëvendosje (LVV), Arjeta Fejza, Rejhan Fejza, në vitin 2020 e kishte quajtur ministrin e atëhershëm të Brendshëm, Xhelal Sveçla, “tru-thatë” dhe të padijshëm.
Megjithatë, në prill të vitit 2025, Rejhan Fejza ishte punësuar në Ministrinë e Punëve të Brendshme (MPB) të Kosovës, duke marrë një pozitë në këtë institucion.

Dhe tash përsëri gruaja e tij shpalljen fituese në konkursin e ATK-së dhe këtu rikthehen pikëpyetjet për rehatimin e familjarëve të deputetes Arjeta Fejza në institucionet publike./Veriu.info















