Operacioni policor ‘Heshtja’ rezultoi në arrestimin e ish-ministrit Astrit Haraqia, Jeton Stanovcin, Gëzim Fekën, Arijanit Beqirin, Alban Malokun, Albert Krasniqin, si dhe Albana Xhemajlin, motrën e ish-kandidates së PDK-së për deputete, Arbana Xhemajlit. Ky operacion kishte cak goditjen e një grupi të organizuar të dyshuar për trafikim dhe shpërndarje të substancave narkotike të llojit kokainë.
Veriu.info ka siguruar kërkesën e prokurorit Arben Hoti për caktimin e masës së paraburgimit ndaj të pandehurve pranë gjyqtarit Gazmend Bahtiri.
Në mesin e personave të arrestuar është edhe Albana Xhemajli, që sipas dokumenteve të prokurorisë, ajo bashkëjetonte me drejtuesin e dyshuar të grupit, Jeton Stanovcin.
Prokuroria pretendon se Albana Xhemajli kishte rolin e mbledhjes së parave nga shitjet e narkotikëve që i bënin Gëzim Feka, Arijanit Beqiri dhe Albert Krasniqi.
Në dosjen e siguruar Veriu.info, thuhet se barazimet e pagesave për sasitë e shitura dhe shpërndara bëheshin çdo të dieleve.

Ndryshe, në media është raportuar se e pandehura Albana Xhemajli është motra e Arbiana Xhemajlit, anëtares së Partisë Demokratike të Kosovës dhe ish-kandidates për deputete në zgjedhjet e shkurtit të vitit 2025.


26-vjeçarja në grupin e të arrestuarve për drogë, është motra e ish-kandidates për deputete















