Sulmuesi i kombëtares së Anglisë, Harry Kane, ka thënë se e kupton zhgënjimin e tifozëve të Anglisë pas performancës së dobët të skuadrës, por u bëri thirrje mbështetësve që të rezervojnë kritikat deri në Kupën e Botës.
Humbja ndaj Italisë të premten mbrëma bëri që Tre Luanët të bijnë nga Liga e Kombeve A, me ekipin që nuk dijnë për fitore në pesë ndeshje, para turneut të madh në Katar këtë dimër.
“Unë e kuptoj zhgënjimin e tifozëve. Unë kam qenë një tifoz i Anglisë – dhe unë jam ende një tifoz i Anglisë, pavarësisht nëse jam duke luajtur apo jo. Kështu që e kuptoj. Por në fund do të gjykohemi për atë që do të ndodhë në nëntor. Nëse kemi një turne të suksesshëm, nuk jam i sigurt se njerëzit do të shqetësohen për lojën që kemi pasur gjatë verës – dhe kjo është përfundimi. Ne duhet të përmirësohemi. Ne e dimë këtë”, tha Kane.
“Tifozët janë gjithmonë të mrekullueshëm dhe qëndrojnë me ne. E di se ata do të jenë atje të hënën duke na mbështetur kundër Gjermanisë dhe të gjithë do të jenë të emocionuar për Kupën e Botës, pavarësisht se çfarë do të ndodhë. Shpresojmë se mund t’i shpërblejmë me disa rezultate të mira”.
Anglia është cilësuar si një nga favoritët për trofeun pas ecurive të mira në Kupën e Botës 2018 dhe Euro 2020, por forma e dobët e tyre kohëve të fundit ka qenë befasuese, shkruan 90Min, transmeton Klankosova.tv.
Vetë Kane po ashtu ka pasur një periudhë jo të mirë në nivelin ndërkombëtar kohët e fundit, duke shënuar vetëm një herë – nga një penallti – në gjashtë ndeshjet e tij të fundit.
Tre Luanët kanë qenë të dobët para portës, duke mos shënuar gol nga loja e hapur në pesë ndeshje.
