Te Manchester Unitedi besojnë se Cristiano Ronaldo nuk do të largohet në afatin kalimtar të dimrit, që hapet në janar.
Sipas “ESPN”, te klubi anglez besojnë se portugezi do të mbetet në skuadër shkak të mungesës së interesimit nga klubet tjera, transmeton Gazeta Express.
Manchester Unitedi thuhet se është i gatshëm për ta lejuar Ronaldon që të largohet në janar, por gjithçka varet nga ajo se nëse ka klube të interesuara për të.
37-vjeçari donte të largohej në verë, por mori vetëm një ofertë nga një klub nga Arabinë Saudite, e cila u refuzua. Ndërkohë, u përfol për një lëvizje të mundshme drejt Chelseat, Napolit apo Bayern Munichit – por që nuk ndodhi gjithashtu.
Sipas burimeve të “ESPN”, pozicioni i Chelseat mund të ndryshojë pas ardhjes së trajnerit të ri, Graham Potter, por klubi londinez tashmë e ka forcuar sulmin pasi ka nënshkruar me Aubameyang. Kujtojmë se ish-trajneri i “Bluve”, Thomas Tuchel, ishte kundër transferimit të Ronaldos.
Ndryshe, Ronaldo me “Djajtë e Kuq” ka kontratë të vlefshme deri më 30 qershor 2023.
Në marrëveshjen e tij me Manchester Unitedin ekziston edhe opsioni për zgjatje të kontratës edhe për një tjetër sezon, por nuk besohet se ky opsion do të shfrytëzohet.
