Java e 11-të në Albi Mall Superligën e Kosovës në futboll do të hapet sot me dy ndeshje.
Skuadra lidere në tabelë dhe e vetmja pa humbje, Drita, do të luajë në udhëtim kundër Dukagjinit, që ka regjistruar dy fitore radhazi së fundmi.
Ndeshja do të zhvillohet nga ora 13:00, në stadiumin “18 Qershori”.
Gjilanasit kanë grumbullar 24 pikë, kurse skuadra nga Klina me 8 pikë renditet e teta në tabelë.
Ndeshja tjetër do të zhvillohet në stadiumin “Fadil Vokrri”, mes Prishtinës dhe Ferizajt, gjithashtu nga ora 13:00.
Kryeqytetasit nuk kanë regjistruar ende fitore si vendas, teksa ferizajasit synojnë befasinë me trajnerin e ri kroat, Andrej Panadic, i cili do të debutojë sot.
Prishtina, që ka luajtur nëntë ndeshje deri më tani këtë sezon, renditet e katërta në tabelë me 12 pikë. Skuadra e drejtuar nga Ismet Munishi nuk di për fitore në tri ndeshjet e fundit, duke regjistruar dy humbje dhe një barazim.
Ferizaj është i fundit me 8 pikë, derisa në katër ndeshjet e fundit ka regjistruar dy humbje e dy barazime.
