Real Madrid po bënë plane të mëdha për blerje të reja, verën që vjen. Në mesin e lojtarëve që i ka targetuar ky klub, sipas portalit goal.com, janë disa prej sulmuesve më të mirë në klubet gjithandej globit. Lista e dëshirave dhe opsioneve është e gjatë por sigurisht, nuk është se Florentino Perez do t’i blejë të gjitha ata që përmenden më poshtë.
Los Blancos ia kanë vënë syrin Harry Kane, kryefutbollistit të Totenhamit në Angli. Nëse mundet, nga ky klub Real do ta merrte edhe brazilianin Richarlison, i cili thuhet se i pëlqen shumë Carlo Anchelotit. Mandej, madrilenët po e monitorojnë edhe Marcus Rashfordin e Unitedit, ndërsa kanë kthyer interesimin që e kishin nga moti kohë më parë, edhe për portugezin Bruno Fernandes. Po ashtu, mbretërit do ta merrnin edhe uruguajanin Darwin Nunezin e Liverpoolit.
Real nuk po e hedh shkopin për peshkim vetëm në Angli, pasi ka dal edhe në Gjermani, ku po e josh Leroy Sane të bavarezëve të kalojë në Madrid. Kur është fjalë për Bundesliga, Reali mbetet pretendenti kryesor për ta sjellë në Bernabeu, Jude Bellingham nga Dortmund, aktualisht futbollistin më të kërkuar në botë. Sigurisht, interesimi nuk ka rënë asnjëherë në zero për francezin Kylian Mbape, i cili këtë verë, por edhe atë të një viti më parë, ishte pranë nënshkrimit me Florentino Perezin.
Derisa ka shumë llafe për të sjellë lojtarë të huaj në klub, Real po mendon edhe të shesë. Mariano Diaz pritet të largohet, ndërsa Lazio ka shfaqur interesim për të. Me pikëpyetje është edhe qëndrimi i Marco Asensio në Madrid, pasi ky lojtar ende nuk ka nënshkruar vazhdimin e kontratës. Ditëve të fundit është përmendur edhe futja e Eduardo Camavingas në pakon për blerjen e Bellingham.
