Armend Thaqi, mbrojtësi i Ballkanit nuk do ta harrojë kurrë vitin 2022.
Për të ishte viti më i mirë në karrierë – pasi kishte momente historike dhe të paharrueshme me klubin e tij, FC Ballkani.
Thaqi me Ballkanin fitoi titullin kampion në Kosovë, teksa më pas arritën edhe kualifikimin në grupet e Conference League, duke u bërë skuadra e parë kosovare që bën një gjë të tillë.
30 vjeçari, Armend Thaqi beson se momenti më i mirë i këtij viti për të ishte ndeshja me Shkupin në Prishtinë – ku Ballkani fitoi në “Play Off” me rezultatin e përgjithshëm 3-1 dhe kaloi tutje në grupet e kompeticionit të UEFA’s.
“Momenti më i mirë këtë vit është ndeshja në Play-Off me Shkupin – pasi arritëm kualifikimin në fazën e grupeve, gjë që është diçka historike deri më tash”, tha fillimisht Armend Thaqi për ‘GazetaBlic Sport’.
Pas kualifikimit historik dhe kalimit në grupet e Conference League, Armend Thaqi ishte një ndër lojtarët kyç dhe fokusi ishte tek ai edhe nga mediat ndërkombëtare dhe jo vetëm. Ai ishte lojtari i parë nga Superliga e Kosovës që u intervistua nga faqja zyrtare mediale e UEFA.
“Normal që momentin kur më kanë kontaktu që unë jam i përzgjedhur të japë intervistë për UEFA’n ka qenë fantastike. Është diçka që më ka bë të ndihem shumë mirë, shumë krenar, sepse m’u ka jep rasti të flasë për futbollin tonë në organizatën më të madhe e normal qe ishte kënaqësi e madhe”, vazhdoi ai.
Për të mos u ndalur me kaq sukseset, goli i tij ndaj Sivvasporit u shpall si më i miri në Conference League. Thaqi tha se kur e kuptoi këtë ishte një moment i madh krenarie për të.
“Edhe vet në ndeshje nuk kam qenë i vetëdijshëm çfarë gole e bukur ishte mirëpo pas ndeshjes e shikova që me të vërtetë ishte fantastike. Edhe më mirë kur u zgjedh si goli më i bukur në Conferencë League, edhe ky është një moment krenarie, sepse është pa në gjithë Europën ai gol”, zbuloi Thaqi.
Në fund, Armend Thaqi tha se viti më i mirë në karrierë ishte ky që po e lëmë pas.
“E them me plot bindje që deri më tani ky është viti më i mirë në aspektin personal, sepse kemi arritur shumë gjëra madhore këtë sezon, duke filluar nga titulli kampion në Kosovë, e pastaj edhe ndeshjet në Europë. Shpresojë që t’i përsërisim këto suksese edhe vitet tjera”, përfundoi ai.
