Komisioni i Garave i Federatës së Basketbollit të Kosovës ka publikuar sot dënimet për xhiron e 19-të të Superligës së Kosovës, ku më së rëndi e ka pësuar skuadra e Bashkimit.
Prizrenasit janë gjobitur në total prej 1050 eurove, kurse me 300 euro tjera shtesë është dënuar kapiteni i skuadrës, Qëndrim Biraj, i cili ishte diskualifikuar nga ndeshja.
Ndeshja mes Bashkimit dhe Trepçës e zhvilluar në palestrën 13 qershori në Suharekë ishte ndërprerë për shkak të incidentit mes skuadrave dhe tifozëve në palestër.
Tifozët e Bashkimit kishin hedhur karrige në drejtim të basketbollistit të Trepçës, Mikaile Tmushiq, ku më pas kishin reaguar edhe basketbollistët tjerë të të dyja ekipeve.
Ndryshe nga Bashkimi, ekipi nga Mitrovica është gjobitur me 150 euro, ndërsa Mikaile Tmushiq me 300 euro për shkak të përjashtimit.
Në kuadër të xhiros së 19-të është dënuar edhe skuadra e Golden Eagle Yllit. Kampioni aktual është gjobitur me 200 euro për shkak të shkeljes së nenit 50.5 të Propozicioneve të Garave.
