Vata: Ndeshja ndaj Polonisë shumë e rëndësishme, futbollistët duhet të luajnë me zemërShare Button Gazeta Blic Rudi Vata është një nga emrat më të mëdhenj të futbollit shqiptar.
Ai ka luajtur rreth 59 ndeshje me kombëtaren prej vitit 1990 deri në 2001, duke shënuar 5 gola.
Vata njihej për karakterin e tij të veçantë brenda fushës, duke treguar karakter dhe forcë në mbrojtje, në pozitën ku luajti.
Në karrierën e tij profesioniste, Vata ka luajtur në disa klube evropiane, tek Celtic dhe St Johnstonte në Skoci, Energie Cottbus dhe Rot Weiss Ahlen në Gjermani, Le Mans dhe Tours në Francë, poashtu në Japoni e Qipro.
Në një prononcim ekskluziv për ‘GazetaBlic Sport’, Vata është deklaruar në lidhje me misionin e madh kualifikues që ka Kombëtarja e Shqipërisë për ‘Euro 2024’.
Ai tha se ndeshja e parë ndaj Polonisë pritet të jetë një ndeshje shumë e vështirë, sidomos kësaj i shtohen edhe mungesat e mëdha.
“Ndeshja e parë e grupit sigurisht se është një ndeshje shumë e rëndësishme, por edhe shumë e vështirë duke marrë parasysh mungesat e Brojës, Gjimshitit dhe Ismajlit. Sigurisht që Polonia është një kombëtare e madhe dhe me traditë. Nga këto eliminatore une pres një Shqipëri të ri grupuar, më mirë të organizuar dhe një Shqipëri që rritet në aspektin e lojës dhe në rezultatet. Është herët të flasim për kualifikim, por ajo që unë dëshirojë të shoh është rritjen e skuadrës, rritjen e grupit dhe përmirësimin e gjendjes së përgjithshme të ekipit kombëtar në këto eliminatore“, tha fillimisht Vata.
Më pas, ai foli edhe për ardhjen e trajnerit të ri (Sylvinho), duke pohuar se shpreson që ai të përshtatet mirë me kombëtaren dhe të implementojë idetë moderne që ka.
“Sylvinho sigurisht se është një trajner i ri, i cili vjen nga shkolla Latino-Amerikane. Është hera e parë që kemi një kombinim të tillë me një staf trajnerësh argjentino-brazilian. Stili agresiv i Argjentinës dhe stili teknik i Brazilit shpresoj që të implementohen tek ekipi ynë kombëtar. Sylvinho ka nevojë për mbështetje, e shikoj që ka një energji pozitive dhe ka ide moderne. Për të ndërtuar një skuadër solide nevojitet kohë e mjaftueshme. Shqipëria ka nevojë për një frymë të mirë të grupit, ashtu siç e kishte në kohën e De Biasit. Nëse futbollistët do të luajnë me zemër dhe do ta kuptojnë përgjegjësinë e fanellës, atëherë jam i bindur që do të ketë edhe rezultate”, përfundoi Vata.
