Mediumi britanik shkruan për repertët shqiptarë dhe jetën e tyre luksoze në Britani
15.04.2023 16:18
Mediumi prestigjioz Daily Mail ua ka kushtuar një artikull të plotë reperëve shqiptarë dhe jetës luksoze që e bëjnë ata në Britani.
“Armë, drogë dhe vajza… rritja e reperëve gangsterë shqiptarë që shfaqin stilin e tyre luksoz të jetesës në Britaninë e Madhe dhe frymëzojnë një brez të rinjsh në shtëpi”, është ky titulli që i ka vënë ky medium artikullit të tij.
Sipas Daily Mail, edhe pse reperët shqiptarë nuk kanë arritur kurrë të renditen në toplistat britanike, ata bëjnë jetë luksoze me shtëpi mbi 600 mijë dollarësh e Rolex me diamante.
Kjo nuk është e tëra, sipas këtij mediumi reperët shqiptarë shpesh promovojnë drogën e krimin e rebelimin ndaj institucioneve britanike në këngët e tyre.
“Interpretues si MGee dhe Lucii janë në mesin e dhjetëra artistëve që grumbullojnë mijëra abonentë në Spotify dhe YouTube falë këngëve të tyre – të cilat shpesh promovojnë krimin me armë dhe drogën, ndërkohë që godasin institucionet e Britanisë. Ajo vjen ndërsa bashkatdhetarët e tyre vazhdojnë të dominojnë tregun ndërkombëtar të kokainës, duke përmbytur rrugët e Britanisë me drogën e klasit A dhe duke përdorur dhunë ekstreme, përfshirë ekzekutimet, për t’u marrë me këdo që i pengon”, ka shkruar Daily Mail.
“Në postimet e mediave sociale dhe videot muzikore, disa yje të repit duket se mbështesin stilin e jetës kriminale teksa tallen me policinë britanike, të cilës i quajnë ‘derra’, ndërkohë që mburren se zotërojnë automatikë Skorpion dhe këshillojnë se si të thyejnë xhamat e makinave”.
Një anëtar i supozuar i Hellbanianz poston një foto të dy anëtarëve të bandës të veshur me kapuç të kuq të zbukuruar me flamurin shqiptar, ndërsa njëri vringëllon një automatik. Grupi shkaktoi zemërim vitin e kaluar kur publikoi një video muzikore që tregonte automjete të blinduara të pajisura me mitraloz të rëndë që parakalonin rreth një banese në kryeqytet. Ndodhi teksa Fabion ‘Gucci’ Kuci dhe Azem ‘Ziro’ Dajci ‘Falcons’ filmuan me paturpësi veten brenda qelive të burgut në Wormwood Scrubs teksa prisnin dënimin për vjedhje dhe postuan foto dhe pamje në Instagram dhe YouTube.
Sipas Daily Mail, prania e tyre në rrjetet sociale – duke përfshirë videot e repit – dyshohet të jetë pjesë e një fushate të përpunuar PR për të “rekrutuar ushtarë” nga Shqipëria duke i tunduar ata me para të gatshme dhe makina luksoze.
Vitin e kaluar u zbulua se shumë nga të rinjtë shqiptarë që largohen për në Angli janë djem që besojnë në tregimet e trafikantëve se mund të pasurohen shpejt në Mbretërinë e Bashkuar dhe shumë e bëjnë këtë pa pëlqimin e prindërve të tyre.
