Nuk ka ekzistuar dokument për ndarjen e Maqedonisë dhe se ideja për ndarjen e vendit është nxjerrë nga pseudo-akademikë të UDB-së, thotë kreu i PDSH-së, Menduh Thaçi, duke përgënjeshtruar deklaratën e para dy ditëve të kreut të integristëve Ali Ahmeti.
“Për ndarjen e Maqedonisë nuk ka pasur dokument. Kanë qenë disa pseudoakademikë në atë kohë, të instruktuar nga UDB-ja e Serbisë, të cilët e nxorën këtë ide. Ajo s’ka qenë ide e Akademisë së Shkencave dhe as Arben Xhaferi nuk ka dokument, sepse nuk ekziston. Ali Ahmetit atëherë UDB-ja i ka thënë: kjo është rruga që mund ta shkatërrosh organizimin politik të shqiptarëve. Dhe ai flet palidhje, na paska ekzistuar dokument”, deklaroi Menduh Thaçi, kryetar i PDSH-së.
Këto komente vijnë pasi në shënimin e përvjetorit të 25-të të Marrëveshjes së Ohrit, kryetari i BDI-së Ali Ahmeti, pas fjalës së ish-ministrit Vllado Buçkovski se ka pasur plan për ndarjen e Maqedonisë, konfirmoi se ai e ka pasur në dorë atë projekt të ndarjes.
“Kishte dilemë nëse duhej të lihej kriza të çonte jo vetëm në shembje e VMRO-DPMNE-së, do të ishte shembje e shtetit, sepse ishte evidente se nisën të dilnin informacionet se përgatitet terreni për ndarje, për shpërnguljen e popujve, linja – nëse dikush i ndjek me vëmendje veprimet ushtarake në prill, maj, qershor 2001, do të tregohet se atë periudhë, 3 muaj, punohej për ndarjen eventuale”, tha Vllado Buçkovski, ish-ministër i Mbrojtjes (2001).
“Po, unë e kam pasur projektin e ndarjes z.Buçkovski! Dhe e kam pasur prej autoriteteve të larta! Dhe unë nuk e kam pranuar! Sepse shqiptarët e Shkupit nuk do të ishin me mua bashkë. Unë do të isha Shqipëri, por Shkup, Kumanovë, Strugë, Kërçovë, Prilep, Veles, të gjithë do të ishin jashtë kufijve të Shqipërisë”, theksoi Ali Ahmeti, kryetar i BDI-së.
Kreu i PDSH-së, Thaçi, paralajmëroi se nëse Ahmeti vazhdon me këso deklaratash, do ta padisë në gjyq në emër të Arben Xhaferit, sepse sipas Thaçit, një denoncim i tillë është i palejueshëm.
