Zyra Kombëtare e Auditimi ka publikuar pasqyrat financiare vjetore të vitit 2024 të Ministrisë së Kulturës, Rinisë dhe Sportit, e cila udhëhiqet nga Hajrulla Çeku.
Rezultatet e auditimit tregojnë një sërë shkeljesh nga kjo Ministri si në rastet e proceseve të rekrutimit, respektimit të afateve ligjore të përcaktuara me ligj për UD, procesit të dhënies dhe menaxhimit të subvencioneve, vonesave në mbyllje të avanceve dhe vonesave në pagesën e faturave.
Ndër të tjera, në këtë raport të auditimit bëhet e ditur se 153 konsulentë janë punësuar në ministri dhe institucionet vartëse të saj përmes kontratave për “shërbime të veçanta”.
Kjo, ndonëse këto kontrata janë të parapara vetëm për angazhime të përkohshme e profesionale, në raste kur mungojnë ekspertë të brendshëm.
Në realitet, këta persona nuk ishin as konsulentë e as ekspertë të jashtëzakonshëm, por zyrtarë të administratës, ligjorë, të financave, arkivistë, IT, vozitës, historianë, etnologë, e të tjerë, që në çdo institucion tjetër do të rekrutoheshin përmes një procesi të rregullt ligjor.
Sipas auditorëve, kjo praktikë është bërë për shkak të “kontrolleve jo të duhura dhe mosaplikimit të drejtë të kërkesave ligjore”. Por në fakt, ky veprim e shkel drejtpërdrejt Ligjin për Zyrtarët Publikë, duke hapur rrugë për punësime selektive, jo transparente dhe potencialisht klienteliste.
Ministri Çeku, përkundër faktit që kjo skemë përbën shkelje të ligjit, është pajtuar me gjetjet e auditorëve, por mbetet të shihet nëse do të përballet me ndonjë përgjegjësi institucionale apo politike.
ZKA rekomandon që MKRS t’i fusë këto pozita në planin vjetor të rekrutimeve dhe të ndalojë menjëherë përdorimin e procedurave të prokurimit për mbulimin e vendeve të rregullta të punës.
Kjo gjetje është vetëm njëra nga shumë që ngrejnë dyshime të mëdha për mënyrën se si MKRS po e menaxhon personelin dhe fondet publike dhe, më gjerë, për mënyrën se si përmes “konsulentëve” po shtohen radhët e punësimeve të kamufluara në sektorin publik.
Punësime pa konkurse e me kandidatë të papërgatitur: MKRS kapet me një tjtër shkelje ligjore
Zyra Kombëtare e Auditimit ka zbuluar një tjetër praktikë të paligjshme brenda Ministrisë së Kulturës, Rinisë dhe Sportit (MKRS), të drejtuar nga ministri Hajrulla Çeku. Në raportin e publikuar për vitin 2024, del në pah se MKRS dhe institucionet vartëse të saj kanë anashkaluar procedurat ligjore të rekrutimit, duke emëruar persona në pozita publike pa konkurs dhe duke shpallur konkurse në kundërshtim me rregullat./Periskopi/Veriu.info
KLIKO KËTU PËR TË PARË RAPORTIN E PLOTË TË AUDITIMIT PËR KËTË MINISTRI
