Një kompleks i ri banesor ka filluar të ndërtohet në qendër të Mitrovicës, ani pse nuk ka leje ndërtimi nga organet kompetente komunale.
Kompania e ndërtimit “Aurora Group” ka filluar të ndërtojë këtë kompeks banesor afër rrugës “Ali Zeneli”, tek ish objekti i Hortikulturës, raporton Gazeta Online Veriu.info.
Veriu.info ka dërguar pyetje në adresë të drejtorisë së Urbanizmit, përkatësisht të drejtorit Edison Tërnava dje dhe sot për të pyetur nëse kjo kompani është pajisur me leje ndërtimi, por ai nuk ka gjetur kohë për të kthyer përgjigje. Por drejtori Tërnava ka gjetur kohë sot të marrë pjesë në një aktivitet të shpërndarjes së miellit për skamnorët, ku donator ishte pikërisht kompania “Aurora Group”.
Pasi që drejtori i Urbanizmit, Edison Tërnava, dje dhe sot nuk ka dhënë përgjigje për këtë çështje në pyetjet e dërguara, sot Veriu.info i ka dërguar pyetje edhe inspektorit komunal të ndërtimit, por as ky i fundit nuk ka kthyer përgjigje.
Burime të Veriu.info nga komuna e Mitrovicës bëjnë të ditur se “Aurora Group” nuk ka leje ndërtimi për këtë parcelë ku tashmë ka filluar ndërtimin e objektit banesor, por që ndërtimin e ka filluar dhe vazhduar normalisht deri sot sikurse të mos kishte inspeksion komunal, i cili më shumë është i fokusuar tek shitësit ambulant, shitësit e pulave të shtuneve në treg pa kushte higjienike dhe shitësit e spinaqit përballë rrethit kryesor të qytetit.
Mësohet se pas pyetjeve të dërguara dje dhe sot në mëngjes nga Veriu.info, sot pasdite inspektorët komunal kanë dalë në vendin ku ka filluar ndërtimi i objektit banesor, ku edhe kanë hartuar procesverbal për gjendjen faktike dhe nesër në mëngjes pritet të nxirret vendimi nga Drejtoria e Inspeksionit për ndërprerjen e punimeve ndaj “Aurora Gruop” në këtë parcelë./Veriu.info
