Drejtoria e Shëndetësisë e Komunës së Mitrovicës që udhëhiqet nga drejtori Fahri Shabani tashmë njihet për shumë skandale të bëra nga drejtori me ekipin e zyrtarëve që e udhëheqin, përfshirë skandalin e marrëveshjes me laboratorin “Avicena”, pagesa të kundërligjshme si avans ndaj kompanive për ndërtimin e QMF-ve, lënie pas dore me vite të veturave zyrtare në parkingje private në qytete jashtë Mitrovicës, dhe jo vetëm.
Veriu.info prej dy javësh është duke hulumtuar edhe për një keqmenaxhim në Drejtorinë e Shëndetësisë të Komunës së Mitrovicës të udhëhequr nga drejtori Fahri Shabani, ku një automjet i aksidentuar që shërben për nevojat e sektorit të shëndetësisë në QKMF-së është lënë i aksidentuar në një punëtori mekanike të një kompanie private në Vushtrri.
Në fund të muajit tetor sinjalizues nga QKMF e Mitrovicës kishin raportuar rastin në Veriu.info, duke treguar se automjeti nuk po rregullohet dhe po qendron me muaj në një servis të paautorizuar në Vushtrri.
Pas publikimit të shkrimit për furgonin që qendronte në një parking të një restoranti në Vushtrri, burime të Veriu.info bëjnë të ditur se me kërkesës të Drejtorisë së Shëndetësisë të dy automjetet janë sjellë në parkingun e QKMF-së në Mitrovicë.
Por Veriu.info posedon fotografi të muajit të kaluar, ku shihet automjeti zyrtar me targa 02-373-FK në oborrin e një servisi të paautorizuar, pra të një servisi që nuk ka marrëdhënie kontraltuale me Komunën e Mitrovicës.
(Foto: Automjeti në fund të muajit tetor 2024 në oborrin e auto-servis “Osmani” në Vushtrri, në kohën e nisjes së hulumtimit nga Veriu.info)
Në fillimisht kemi dërguar pyetje në Drejtorinë e Shëndetësisë të Komunës së Mitrovicës, përmes zyres për infomim, për t’i pyetur për akisdentimin e këtij automjeti zyrtar.
Në pyetjen se ku gjendet automjeti i sektorit te shëndetësisë me targa 02 373 FK dhe se a gjendet në hapësirat e dedikuara për automjete pranë institucioneve shëndetësore/komunale në Mitrovicë, Drejtoria e Shëndetësisë e Komunës së Mitrovicës është përgjigjur, duke futur në ‘cc’ Drejtorinë e Shëndetësisë, Fahri Shabani dhe drejtorin e QKMF-së, Fevzi Sylejmani, duke thënë: “Automjeti me Targat 02-373-FK pas aksidentit gjendet ne hapësirat e dedikuara për automjetet e parkut vozitës të QKMF”, por që nuk kanë treguar se automjeti është sjellë në Mitrovicë vetëm pas nisjes së hulumtimit nga Veriu.info në fund të muajit tetor 2024.
(Foto: Automjet i kthyer në fillim të muajit nëntor 2024 në parkingun e QKMF-së në Mitrovicë, pas nisjes së hulumtimit nga Veriu.info)
Ndërsa, në pyetjen se kur është aksidentuar dhe a është rregulluar, në mënyrë që të hyjë në funksion të ofrimit të shërbimit për pacientë, Drejtoria e Shëndetësisë për Veriu.info ka thënë: “Automjeti është aksidentuar me datën 28-12-2023 dhe nuk është rregulluar për shkak mungesës se kontratës në kohën kur është ka pësuar aksident (kontrata me nr prokurimit 642-20-920-2-1-1 nr brendshëm 642/20/007/211 e aplikueshme prej datës 17/07/2020 deri 16/07/2023) d.m.th. aksidenti ka qenë në periudhën kohore qe nuk kemi pas mbuleshmeri me kontratë. Kontrata e re është e aplikueshme prej 19/06/2024”.
Kjo përgjigje e Drejtorisë së Shëndetësisë bie në kundërshtim të plotë me vetëveten, pasi që fillimisht thuhet se vetura është aksidentuar në dhjetor 2023 dhe nuk është rregulluar pasi që kontrata e vitit të kaluar për mirëmbajtje të automjeteve kishte skaduar më 17 korrik 2023, ndërsa në pjesën e dytë thuhet se kontrata e re është nënshkruar më 19 qershor 2024, por që faktikisht akoma nuk është rregulluar automjeti. Pra, nëse në momentin e aksidentimit ka qenë problem mungesa e kontratës, shtrohet pyetja pse nuk është rregulluar prej qershorit me kontratën e re?!
Veriu.info mëson se arsyeja pse nuk është rregulluar automjeti as me kontratën e re, ani pse ka rreth pesë muaj që është nënshkruar, është sepse në kontratën e re nuk janë të parapara gjitha pjesët e automjetit të aksidentuar.
Të pyetur nga Veriu.info se në momentin e aksidentimit a ka qenë në udhëtim zyrtar automjeti dhe në cilin vend është aksidentuar, Drejtoria e Shëndetësisë ka thënë se automjerti i aksidentuar ka qenë në kryerjen e aktiviteteve zyrtare, por që nuk është përgjigjur për vendin e aksidentit.
Arsyeja pse e kemi bërë pyetjen e fundit është sepse sinjalizuesit e Veriu.info nga QKMF e Mitrovicës, kanë raportuar në redaksi se vetura është aksidentuar në një vendbanim që nuk përkon me zonën që ofron shërbime QKMF e Mitrovicës. Për të vërtetuar këtë pretendim të sinjaliesuve ne dërguam pyetje, por nuk morëm përgjigje. Në mënyrë që të sqarojmë situatën për vendin e aksidentit të automjetit, Veriu.info do të kërkoj nga Komuna e Mitrovicës qasje në dokumente zyrtare, përkatësisht në raportin mbi aksidentin e veturës.
Veriu.info ka kontaktuar edhe me Hasan Osmanin, pronarin e kompanisë N.Sh. “Osmani”, në servisin e të cilës automjeti zyrtar i QKMF-së së Mitrovicë kishte qendruar për muaj të tërë, duke e pyetur se përse automjetin zyrtar i sektorit të shëndetësisë të Komunës së Mitrovicës ka qendruar për kohë të gjatë në oborrin e servisit tuaj, por ai e ka mohuar këtë, duke kërkuar të paguhet nga gazetarja për të folur.
“Ku ka qendru në cilën garazh, joo nuk ka qëndru, gabim je, pagum un foli qe sem pagun nuk foli”, ka thënë Hasan Osmani për Veriu.info, duke mbyllur telefonin pa përgjigje. Gazetarja e Veriu.info i ka dërguar edhe më shkrim në Whatsapp pyetjet, të cilave u aka bashkëngjitur edhe foton e automjetit të Komunës në oborrin e servisit të tij, por ai nuk ka kthyer përgjigje deri në momentin e publikimit të këtij artikulli.
(Foto: Automjeti në fund të muajit tetor 2024 në oborrin e auto-servis “Osmani” në Vushtrri, në kohën e nisjes së hulumtimit nga Veriu.info)
