Deputetja e Lidhjes Demokratike të Kosovës, Hykmete Bajrami, ka hedhur kritika të forta ndaj qeverisjes së Albin Kurtit, duke pretenduar se pas gati gjashtë vitesh në pushtet, premtimet e bëra në fillim të mandatit janë ende larg realizimit.
Përmes një postimi në Facebook, Bajrami ka thënë se qytetarët tashmë nuk duhet ta vlerësojnë kryeministrin bazuar në atë që premton, por në atë që ka arritur të realizojë gjatë viteve në pushtet.
“Pyetja nuk është më: Çka po premton Albin Kurti? Pyetja është: Pse nuk i bëri këto që i premtoi që gjashtë vjet?”, ka shkruar ajo.
Sipas deputetes së LDK-së, Kurti po rikthehet me premtime të ngjashme me ato që i kishte bërë në fillim të qeverisjes, ndonëse, siç pretendon ajo, gjatë kësaj periudhe ka pasur shumicën parlamentare, kontrollin e institucioneve qeveritare dhe buxhete të konsiderueshme në dispozicion.
“Pas gjashtë vjetësh në pushtet, qytetarët nuk të gjykojnë më për premtimet, të gjykojnë për rezultatet”, ka deklaruar Bajrami.
Në listën e saj të kritikave përfshihen disa prej fushave kryesore të qeverisjes, nga ekonomia dhe punësimi, te arsimi, shëndetësia, investimet kapitale, energjia, lufta kundër korrupsionit, funksionimi i institucioneve dhe politika e jashtme.
Sa i përket arsimit, Bajrami ka pretenduar se reforma e premtuar nuk është realizuar, ndërsa për shëndetësinë ka veçuar listat e pritjes, mungesën e barnave dhe largimin e profesionistëve shëndetësorë.
Kritikat e saj vijnë në kohën kur Qeveria Kurti po përballet sërish me debatin për bilancin e viteve të qeverisjes dhe premtimet që janë dhënë ndër vite.
