Agjencia për Parandalimin e Korrupsinit ka nisur me publikimin e regjistrave të pasurisë të zyrtarëve publikë për vitin 2025.
Zëvendëskryeministrat e Qeverisë Kurti, Besnik Bislimi e Donika Gërvalla edhe kësaj rradhe kanë deklaruar shifra të larta të pasurisë.
Bislimi ka deklaruar se i ka në pronësi tri banesa. Të trija së bashku, arrijnë vlerën e mbi 277 mijë eurove.
Ai e ka deklaruar edhe një veturë si pasuri të luajtshme, në vlerë të 15 mijë euro.
Bislimi ka para të gatshme rreth 5 mijë e 400 euro në pronësi të bashkëshortes dhe afër 4 mijë e 500 euro të fëmijëve.
Gërvalla në anën tjetër ka goxha pasuri të paluajtshme. Ajo ka deklaruar një truall 20 mijë euro, një arë 15 mijë euro, një pyll 10 mijë euro dhe një shtëpi në vlerë të 80 mijë euro.
Bashkëshorti i saj po ashtu ka një pyll në vlerë të 10 mijë euro.
Si pasuri të luajtshme, Gërvalla ka deklaruar një veturë të saj që kushton 7 mijë euro, një veturë të bashkëshortit në vlerë të 10 mijë euro dhe veturën e fëmijëve në vlerë të 16 mijë e 500.
Kryediplomatja në largim e ka edhe një biznes në pronësi të saj, si dhe është bashkëpronare në dy biznese të tjera.
Ajo ka para të gatshme rreth 5 mijë euro.
Ndërkohë, pasuria e paluajtshme e kryeministrit në largim, Albin Kurtit ka mbetur e njëjtë, me bashkëshorten e tij që posedon një banesë në vlerë të 400 mijë euro.
Megjithatë, Kurti ka deklaruar se ka para të gatshme rreth një mijë e 800 euro në bankë.
Bashkëshortja e tij ka deklaruar 15 mijë euro në një bankë në Norvegji, ndërsa edhe 500 euro të tjera si kursime të vajzës.
Qiraja e Kurtit në një prej lagjeve më të përshtatshme në kryeqytet vazhdon të jetë vetëm 250 euro.
