“Shifrat dhe faktet demantojnë propagandën”, shkroi deputeti Hekuran Murati – i cili vazhdon ushtrojë jashtëligjshëm njëkohësisht edhe pozitën e ministrit në detyrë të Financave – teksa shpërndau një grafik: Kosova 4.58% kundrejt mesatares së rajonit 3.13% për tremujorin e dytë të vitit 2025.
Propaganda është e thjeshtë: ‘ekonomia po përshpejton’ – dhe kushdo që mendon ndryshe, akuzohet se po propagandon.
Në një analizë dhe krahasim të kujdesshëm të shifrave të performancës ekonomike, krahasimi i Muratit del i ngushtë, selektiv dhe metodologjikisht i brishtë.
“Shifrat dhe faktet demantojnë propagandën. Për tremujorin e dytë të këtij viti, ekonomia e Kosovës sipas ASK-së ka shënuar rritje prej 4.58%. Për të njëjtën periudhë, mesatarja e rritjes ekonomike në vendet e rajonit të ballkanit perëndimor ishte 3.13%.” – shkroi Murati.
Ja pse.
Murati zgjedh një dritare të vetme kohore dhe e krahason me TM2/2024 (4.32%), për të dalë në konkluzionin e “përshpejtimit”.
Në fakt, që nga 2022-i BPV-ja reale është sillur rreth tavanit 4.5%. Një tremujor pak më i lartë brenda këtij korridori nuk përbën kthesë strukturore, por luhatje normale të ciklit.
Çka nuk tregon qeveria Kurti: Shtatë nga njëmbëdhjetë vitet para pandemisë e tejkaluan pa bujë nivelin 4.58%. Pra, ajo që sot shitet si “arritje” ka qenë normë në shumicën e viteve të dekadës së mëhershme.
Pa këto qartësi, 4.58% kundrejt 3.13% të mesatares së rajonit është një krahasim i rrahur për efekt vizual, jo dëshmi e domosdoshme e performancës së mirë ekonomike.
Edhe nëse pranojmë shifrën 4.58% për TM2/2025, trajektorja e inflacionit na projeksionon ftohje të rritjes reale në pjesën e dytë të vitit. Me këtë rritje të çmimeve, pritjet janë për zbehje në TM3 dhe, nëse presioni vazhdon, edhe në TM4.
Raporti i Bankës Botërore “Perspektivat Ekonomike Globale” e sheh Kosovën me 4.4% për 2024, ndërsa 3.8% për secilin nga vitet 2025, 2026, 2027. Për më tepër, këto projeksione janë ulur krahasuar me janarin (-0.1 pp për 2025 dhe -0.2 pp për 2026).
Agjencia e Statistikave të Kosovës ka publikuar edhe material që mundëson krahasimin katërvjeçar të Qeverisë Kurti 2 me pararendëset. Në të, e gjithë periudha 2022-2024 qëndron nën 4.57%—ndërkohë shtatë vite të dekadës së mëhershme e kalojnë këtë kufi pa vështirësi.
Përpjekja e Albin Kurtit të Vetëvendosjes për të nxjerrë një “mesatare 6.3%” duke përzier 2021-2023-in, e ngrenë artificialisht rezultatin me shpërthimin 16.32% në TM1/2021— periudhë e rihapjes pas pandemisë, jo e meritës politike.
Në këtë kalkulim të qëllimshëm, Kurti merrte merita për fillimin e vitit 2021, kur BPV-ja kishte shpërthyer në 16.32 për qind gjatë tremujorit të parë – periudhë kur ai porsa kishte marrë pushtetin.
Ritmet vjetore për 2021–2024 afrohen me një mesatare 6%: pas rikthimit post-pandemik në 2021 (rreth 10.7%), rritja u ngadalësua djeshem rreth 4.3% (2022), 4.1% (2023) dhe 4.4% (2024).
