Zëvendëskryeministri Besnik Bislimi ka reaguar ndaj deklarimeve të Partisë Demokratike të Kosovës (PDK), e cila ka njoftuar se do t’i dërgojë në Gjykatën Kushtetuese 20 ligjet e miratuara në Kuvendin e Kosovës më 5 dhjetor.
Bislimi theksoi se këto veprime janë një përpjekje për të penguar avancimin dhe zhvillimin e shtetit të Kosovës, duke përfshirë anëtarësimin e vendit në Zonën e Vetme të Pagesave Evropiane (SEPA).
“Me njoftimin e PDK-së se 20 ligjet e miratuara të enjten e kaluar në seancën e Kuvendit do t’i dërgojnë në Gjykatë Kushtetuese, dëshmohet qartë që jo vetëm se ky është mjet i tyre për të tentuar ndalimin e hovit të avancimit dhe zhvillimit të shtetit, por edhe se ndihen të kërcënuar nga një shtet që zhvillohet e bën progres.
Në mesin e 20 ligjeve të miratuara më 5 dhjetor, janë edhe tre ligje kyçe për zhvillimin financiar të vendit, të cilat i hapin rrugën anëtarësimit të Republikës së Kosovës në Zonën e Vetme të Pagesave Evropiane (SEPA).
Bëhet fjalë për ligjin për bankat, ligjin për shërbimet e pagesave dhe ligjin për parandalimin e pastrimit të parave dhe luftimin e terrorizmit. Ligjet janë të parapara të sjellin më shumë transparencë financiare në vend, përafrim me tregun e Bashkimit Evropian si dhe përfitime të prekshme për qytetarët”, ka shkruar Bislimi në Facebook.
Bislimi e sheh këtë si një përpjekje për të penguar zhvillimin e Kosovës, transparencën financiare dhe uljen e kostove të pagesave ndërkufitare, duke dëmtuar qytetarët dhe ekonominë.
“Anëtarësimi në SEPA do të sjellë dhe një ulje të kostos së pagesave ndërkufitare deri në 55 milionë euro në vit. Ato janë një lehtësim i madh për familjet që pranojnë para nga të afërmit jashtë vendit dhe për bizneset që operojnë me partnerë ndërkombëtarë. Pra PDK-ja po ka qëllim që t’i dëmtojë qytetarët dhe bizneset në koston e të paktën 55 milionë eurove në mënyrë direkte në vit.
Pjesë e seancës së kaluar, e që PDK synon ta dërgojë në Gjykatën Kushtetuese, është edhe Byroja Shtetërore për Verifikimin dhe Konfiskimin e Pasurisë së Pajustifikueshme, të cilën tashmë PDK po e dërgon për të dytën herë në Kushtetuese.
Ç’ka ka të bëjë me transparencë financiare, e pengon PDK-në. Ç’ka ka të bëjë me ulje të kostos për bizneset dhe qytetarët e pengon PDK-në. Ç’ka ka të bëjë me avancim të shtetit, e pengon PDK-në”, ka shtuar më tutje Bislimi./Indeksonline/
