Nisma e re B.O.A.T. (Ballon d’Or Of All Time), e cila synon të përcaktojë futbollistin më të mirë të të gjitha kohërave mes fituesve të shumëfishtë të Topit të Artë, ka ngjallur debat të madh mes tifozëve të futbollit.
Megjithatë, ndonëse ideja lidhet me legjendat e këtij sporti, organizatorët kanë sqaruar se BOAT nuk është rikthim i Super Topit të Artë, pasi bëhet fjalë për dy iniciativa krejtësisht të ndryshme.
BOAT është një sondazh publik, përmes të cilit tifozët nga e gjithë bota mund të votojnë për fituesin e tyre të preferuar të Topit të Artë, duke përfshirë futbollistët që e kanë fituar këtë çmim të paktën dy herë.
Kjo nismë nuk përbën një çmim zyrtar dhe nuk shoqërohet me ndonjë trofe fizik.
Sipas organizatorëve, Cristiano Ronaldo është aktualisht në krye të votimit, ndërsa rezultatet përfundimtare do të publikohen më 28 tetor 2026, dy ditë pas ceremonisë së Topit të Artë.
Në anën tjetër, Super Topi i Artë është një çmim historik i revistës franceze France Football, i cili është ndarë vetëm një herë, në dhjetor të vitit 1989.
Ky trofe iu dha legjendës së Real Madridit, Alfredo Di Stéfano, i cili triumfoi në garën mes emrave më të mëdhenj të futbollit, duke lënë pas Johan Cruyffin dhe Michel Platinin.
Fituesi u përcaktua përmes një procesi votimi ku morën pjesë ekspertë, fitues të mëparshëm të Topit të Artë dhe lexues të revistës.
Që nga ajo kohë, Super Topi i Artë nuk është ndarë më dhe nuk ka ndonjë datë zyrtare për rikthimin e tij.
Ndërkohë, ceremonia e 70-të e Topit të Artë do të mbahet më 26 tetor 2026, në Londër.
BOAT synon të rikthejë në vëmendje debatin e përjetshëm se cili futbollist meriton të konsiderohet më i miri në histori, por rezultati i votimit do të mbetet një zgjedhje e tifozëve dhe jo një çmim zyrtar. /IndeksOnline/
