Sekretarja e Përgjithshme e PDK-së, Vlora Çitkau, është shprehur e bindur se opozita do të formojë qeverinë e re. Ajo ka bërë me dije se kjo parti është e gatshme të marrë përgjegjësinë për formimin e qeverisë se re.
Në këtë intervistë dhënë gazetës Nacionale, Çitaku ka thënë se PDK-ja do t`i respektojë të gjitha procedurat kushtetuese dhe ligjore për këtë proces.
“Ne e kemi lexuar drejt rezultatin zgjedhor, sigurisht se kemi rregullat dhe procedurat. I takon fillimisht partisë së parë që të provojë të formon qeverinë, mirëpo ne jemi të bindur se qeverinë e ardhshme të Republikës së Kosovës do të udhëheq opozita e deridjeshme”, ka thënë Çitaku.
Ajo ka qartësuar se bashkëpunimi me partinë në pushtet nuk është i mundur për shkak të diferencave të mëdha.
“Nuk është ky një refuzim kryeneç, sepse kemi vendosur ashtu. Thjeshte jemi shumë të ndryshëm dhe nuk shohim asnjë mundësi që të bashkëqeverisim me Lëvizjen Vetëvendosje”, ka thënë ajo.
Sipas tij, një gjë e tillë nuk është e mundur edhe sikur LVV-ja të ia jep PDK-së postin e kryeministrit.
“Nuk shohim asnjë mundësi, as edhe me kushtin që z. Hamza të jetë kryeministër që të bashkëqeverisim me Lëvizjen Vetëvendosje. Nuk po them diçka të re, këtë e ka bërë shumë të qartë edhe vet kandidati për kryeministër, z. Hamza dhe kryetari i partisë”, është shprehur Çitaki, e cila në zgjedhjet e 9 shkurtit, sipas rezultateve preliminare të KQZ-së, i ka marrë 38 mijë e 806 vota.
Ajo ka treguar se deri me tani nuk kanë diskutuar me partitë politike opozitare në lidhje me ofrimin e Qeverisë se re.
Sipas saj, negociatat do të fillojnë pas certifikimit të rezultatit të zgjedhjeve.
“Ne do të bëjmë përpjekje. Pas certifikimit të rezultatit të zgjedhjeve, pas konstituimit të parlamentit, do të hyjmë në orën e re, ku janë afet kushtetuese dhe ligjore për ndërtimin e institucioneve. Ne nuk do të ikim nga përgjegjësia për të ndërtuar një qeveri të re me shumicën shqiptare. Sigurisht për t`i dhënë Kosovës qartësi, stabilitet, parashikueshmeri, zhvillim dhe partneritet me aleatët tanë kyç.”, ka thënë Çitaku.
Ikja e deputetëve
Sekretarja e Përgjithshme e PDK-së ka mohuar se ndonjë deputet i kësaj partie mund të largohet dhe t`i bashkohet VV-së.
Ajo ka bërë me dije se të gjithë deputetët e PDK-së janë besnik ndaj partisë.
“PDK-ja është më e bashkuar se kurrë, PDK-ja është më e unifikuar së asnjëherë me parë. Të gjithë kandidatët për deputetë, edhe ata që sipas të gjitha gjasave do të zgjidhen, por edhe të tjerët që kanë qenë në listën tonë kandiduese, kanë besnikëri në raport me Partin Demokratike të Kosovës”, ka vlerësuar Çitaku.
Ajo ka deklaruar se spekulimet se ndonjë deputetët i PDK-së mund t`i bashkohet pushtetit kanë qenë të nxitura nga LVV-ja.
“Është një listë kandiduese, e cila është besnike ndaj Partisë Demokratike të Kosovës dhe vlerave që PDK-ja përfaqëson. Ne kemi kontakte të vazhdueshme, kemi mbledhje të rregullta të partisë. Më shumë këto lloj spekulimesh kanë qenë të nxitura nga partia që sot qeverisë me Kosovën për të shkaktuar panik dhe huti. Mirëpo, unë iu konfirmoj se të gjithë deputetët, dhe ata që pritet të konfirmohen i qëndrojnë besnik PDK-së”, është shprehur zyrtarja e lartë e PDK-së.
Në këtë intervistë, ajo ka folur edhe për kritikat ndaj PDK-së rreth numrit të madh të kandidatëve për deputetë nga Drenica.
Çitaku ka vlerësuar se PDK-ja është parti nacionale dhe deputetët e rinj janë nga të gjitha rajonet e Kosovës.
“Nëse e merreni dhe e shihni listën kandidtuese dhe kandidatët që potencialisht mund të zgjidhet deputet, e shihni se ka një gjithëpërfshirje rajonale, profesionale dhe gjinore”, ka thënë ajo.
Sipas saj, do të duhej të ishte turp për një parti, po të mos kishte deputetë nga Drenica.
“Do të duhej të ishte turp për një parti, që të mos ketë deputetë nga Drenica, e jo të sulmohet një parti pse ka deputetë nga Drenica”, është shprehur Çitaku.
