Deputetja e PDK’së, Vlora Çitaku, ka reaguar për vdekjen e Flora Brovinës. Ajo ka shkruar se Brovaina ka qenë një grua e jashtëzakonshme, trime, intelektuale e fisnike.
Çitaku ka thënë se s’do ta harrojë kurrë takimin e saj të parë me Thaçin dhe luftëtarët tjerë, pas lirimit të saj nga burgu.
Reagimi i plotë:
Na paska lënë Flora Brovina.
Një grua e jashtëzakonshme. Trime, intelektuale, fisnike. Një grua që, edhe pasi kishte kaluar nëpër aq shumë vuajtje, rezatonte vetëm mirësi.
Nuk kam për ta harruar kurrë takimin e saj të parë me Hashim Thaçin dhe luftëtarët e UÇK-së, pas lirimit të zonjës Brovina nga burgjet serbe, ku po mbahej si peng lufte.
“Djemtë e mi, sa më paska marrë malli për ju. Edhe më të bukur se në TV po më dukeni. Me ju jam gjithmonë.”
Kështu ishte Flora. E ngrohtë, e guximshme, e pathyeshme. Me një dashuri të pakushtëzuar për Kosovën dhe njerëzit e saj.
Jeta e saj ishte dëshmi e një gruaje që e deshi lirinë, i shërbeu vendit të saj dhe, edhe përballë së keqes, nuk e humbi kurrë njerëzoren.
Dritë të pastë shpirti, Flora Brovina.
Kosova do të të kujtojë me nder e mirënjohje. 🕊️
