Rezultati i zgjedhjeve të fundit parlamentare, ku Lidhja Demokratike e Kosovës u rendit sërish si subjekti i tretë politik në vend, ka nxitur përplasje dhe prapaskena të ashpra brenda strukturave të kësaj partie. LDK tashmë duket e ndarë në dy taborre: në ata që kërkojnë me ngulm dorëheqjen e kryetarit Lumir Abdixhiku për shkak të rezultatit të dobët, dhe në pjesën tjetër që mbështet udhëheqjen e tij dhe e vlerëson pozitivisht vizionin e tij politik.
Debati publik është ndezur sërish sot pas një postimi nga anëtari i Kryesisë të LDK-së, Shkëmb Manaj, i cili ka dalë në mbrojtje të Abdixhikut dhe ka akuzuar hapur disa eksponentë brenda partisë për sabotim të procesit zgjedhor.
“Ndryshimet në LDK mund t’i bëjë vetëm vullneti i anëtarësisë së saj! Por ato nuk mund t’i udhëheqin ata që në disa palë zgjedhje kanë folur më shumë për rënien e LDK-së sesa për ringritjen e saj. Nuk mund t’i bëjnë ata që statuset për ‘ndryshim’ i kishin gati pa u mbyllur kutitë e votimit… Ata që e sabotuan LDK-në në këtë proces zgjedhor. Dhe ata kanë emër dhe mbiemër”, ka shkruar Manaj, duke shtuar se vizioni i Abdixhikut për bashkim me Presidenten Vjosa Osmani kishte efekt pozitiv.
Ky reagim i Manajt ka provokuar kundërshtime të menjëhershme nga krerët e degëve në terren.
Kryetari i Degës së LDK-së në Deçan, Jeton Mushkolaj, ka reaguar ashpër ndaj Manajt, duke ia kujtuar atij të kaluarën brenda strukturave.
“Nuk jam njeri që reagoj në postime, veç beso s’po mundem mu përmbajt. Kur po të shoh ty e disa të tjerë tuj fol për interesa të LDK-së e për sabotime… e deri dje në kryesinë e degës nuk të ka lonë Haki Rugova… po e nal veten”, ka shkruar Mushkolaj.
Në këtë debat është përfshirë edhe Kryetari i Komunës së Istogut nga radhët e LDK-së, Ilir Ferati, i cili i ka kërkuar sqarime Mushkolajt: “Jeton Mushkolaj, nëse s’kemi legjitimitet me fol për LDK-në, tregona i dashtun Jeton!”.
Ndërkaq, Mushkolaj i është kundërpërgjigjur menjëherë Feratit duke e pyetur: “Ilir Ferati, nuk e di arsyen e reagimit tuaj ndaj këtij komenti. A jeni të legjitimuar të reagoni ndaj çdo komenti që bëhet?”.
Kjo përplasje virtuale reflekton tensionet e thella brenda LDK-së, ku pas shpalljes së rezultateve, figura kyçe dhe me peshë elektorale brenda partisë, si Gazmend Muhaxhiri dhe Imri Ahmeti, kanë kërkuar hapur dhe me deklarata të bujshme dorëheqjen e Lumir Abdixhikut nga kreu i partisë./Insajderi
