Gjithnjë e më shumë njerëz sot po përballen me ankthin dhe një ndjenjë tensioni të brendshëm. Edhe pse shkaqet mund të ndryshojnë, ushqimi luan një rol të rëndësishëm në mënyrën se si ne përballemi me sfidat psikologjike.
Disa ushqime mund të përkeqësojnë më tej simptomat e ankthit, kështu që është e rëndësishme të dini se cilat duhet të shmangni ose të paktën të reduktoni marrjen e tyre.
Edhe pse alkooli mund të duket relaksues në shikim të parë, ai në fakt prish ekuilibrin kimik në tru, veçanërisht duke prekur serotoninën – hormonin përgjegjës për humorin e mirë. Pas zhdukjes së efekteve të alkoolit, shumë njerëz vërejnë një përkeqësim të ankthit të tyre.
Nëse mjeku juaj nuk ju ka këshilluar në mënyrë specifike të shmangni alkoolin, konsumimi i rastësishëm në sasi të vogla mund të jetë i pranueshëm. Megjithatë, në situata sociale, gjithnjë e më shumë rekomandohen alternativa si birra pa alkool, uji mineral me aromë apo mocktails – kokteje pa alkool.
Kafeina, e cila konsumohet më shpesh përmes kafesë, çajit dhe pijeve energjike, mund të jetë një shkas për episode ankthi, veçanërisht te njerëzit që tashmë janë të ndjeshëm ndaj tij. Rritja e marrjes së kafeinës mund të shkaktojë tension, rrahje të shpejta të zemrës dhe madje edhe sulme paniku. Nëse vëreni se kafeja ju bën më nervozë, provoni ta zëvendësoni me çajra bimorë që kanë efekt qetësues – si livando, kamomil, nenexhik ose balsam limoni, raporton Telegrafi.
Sheqernat e rafinuar mund të shkaktojnë luhatje të papritura në nivelet e sheqerit në gjak, duke çuar shpesh në luhatje të humorit, nervozizëm dhe rritje të tensionit. Marrja e tepërt e sheqerit, sipas disa hulumtimeve, ndikon negativisht në sekretimin e dopaminës – një neurotransmetues i lidhur me ndjenjën e kënaqësisë. Përveç ëmbëlsirave të dukshme, sheqeri shpesh fshihet në produkte të tilla si salcat e gatshme, drithërat e mëngjesit dhe mbushjet e ndryshme.
Ushqimet si buka e bardhë, makaronat e thjeshta, orizi i bardhë dhe soda përmbajnë karbohidrate të përpunuara që janë lidhur me një rritje të simptomave të ankthit dhe depresionit. Konsumimi afatgjatë i produkteve të tilla mund të ndikojë negativisht në shëndetin mendor.
Në vend të kësaj, rekomandohet përfshirja e drithërave të plota si makarona me grurë integrale, orizi kaf, ose ‘quinoa’, të cilat i japin trupit energji pa ndryshime të papritura të humorit.
