Autostrada nga Fushë Kosova që shkon në drejtim të Pejës dhe Prizrenit, është një nga akset rrugore më të frekuentuara në Kosovë. Megjithatë, kjo nuk e ka penguar kompaninë EX FIS Sh.P.K. që të ushtrojë aktivitetin e shitjes së derivateve të naftës pa licencë në këtë pikë. Për rreth dy vite, veprimtaria ilegale ka vijuar pa ndërhyrje, derisa institucionet e Kosovës kanë konstatuar se kompania po operonte në kundërshtim me ligjin për ushtrimin e veprimtarisë.
Veriu.info ka siguruar një kërkesë të Inspektoratit Qendror të Mbikëqyrjes së Tregut për fillimin e procedurës kundërvajtëse në Gjykatën Themelore në Gjakovë ndaj EX FIS Sh.P.K. me pronar biznesmenin Isa Muharremi.
Në këtë dokument zyrtar që mban datën 20 prill 2026, tregohet se si inspektorët e IQMT-së kishin kapur EX FIS-in e Isa Muharremit duke shitur naftë pa licencë.
“Gjatë inspektimit të kryer është kërkuar të prezantojë licencën e NDN-së në procesverbalin e inspektimit të datës 26.02.2026. Mirëpo, pala prezente nuk ka arritë të prezantoj dokumentin e kërkuar, ku i është dhënë afat prej 30 ditësh të prezantoj dokumentin përkatës për ushtrimin e veprimtarisë për shitje me pakicë dhe pas këtij afati subjekti ekonomik EX FIS nuk e ka prezantuar dokumentacionin e kërkuar nga inspektorët e Tregut brenda afatit ligjor”, thuhet në dokumentin e siguruar nga Veriu.info.
Në kërkesën me të cilën IQMT-ja i është drejtuar gjykatës, bëhet e ditur se EX FIS nuk posedon leje për ushtrimin e veprimtarisë afariste, e cila është e obliguar me nenin 6 të Ligjit për Tregtinë me Produkte të Naftës dhe Karburanteve të ripërtëritshme.
Kërkesës drejtuar gjykatës Inspektorati Qendror i Mbikëqyrjes së Tregut i ka bashkëngjitur si provë edhe procesverbalin me numër 24/000544.
Veriu.info ka kërkuar nga Inspektorati Qendror i Mbikëqyrjes së Tregut qasje në këtë procesverbal, por zyrtari përgjegjës për qasje në dokumente publike, Xhemajl Jashari nuk ka dhënë qasje në këtë dokument.
Çka parasheh neni 6 i Ligjit për Tregtinë e Naftës?
Akti ligjor të cilin e ka shkelur EX FIS me rastin e ushtrimit të veprimtarisë pa licencë thotë se të gjitha subjektet duhet të pajisen me leje të vlefshme.
Paragrafi 1 i nenit 6: Të gjitha subjektet që merren me veprimtari të produkteve të naftës ose karburanteve të ripërtëritshme, duhet të pajisen me leje të vlefshme.
Shkelja e ligjit duke ushtruar veprimtarinë pa leje sanksionohet me paragrafin 2 të nenit 19 të Ligjit për Tregtinë e Naftës, ku parashihet gjobë deri në 15 mijë euro për persona juridikë, siç është në këtë rast EX FIS.
Prej kur funksionon EX FIS në Kijevë të Malishevës?
Nga publikimet e EX FIS në faqen e tyre në Facebook, kuptohet se kjo pikë e shitjes së derivateve të naftës është hapur në prill 2024. Se si ka arritur të funksionojë në qendër të autostradës për rreth dy vite pa licencë, kjo është e paqartë, përveç nëse dikush nga shteti i ka qëndruar përkrah!?
Në kërkesën e IQMT-së drejtuar gjykatës nuk bëhet e ditur nëse kjo pikë është mbyllur në mungesë të licencës apo është lënë të vazhdojë operimin pa leje edhe më tutje. Por që është e qartë se të paktën 30 ditë pa licencë ka funksionuar edhe pas inspektimit, pasi që inspektorët e Tregut i kanë dhënë afat 30 ditor të prezantojë licencën, të cilën siç bëhet e ditur në dokument nuk e ka prezantuar.
Veriu.info ka tentuar të marrë një qëndrim nga EX FIS Sh.P.K lidhur me ushtrimin veprimtarisë në mënyrë ilegale, por deri në momentin e publikimit të artikullit nuk ka pranuar përgjigje për pyetjet e dërguara.
Kush është EX FIS?
Kompania EX FIS Sh.P.K. që merret me shitjen e derivateve të naftës me shumicë dhe pakicë është e themeluar në vitin 2005, ku 100% të aksioneve i zotëron biznesmeni Isa Muharremi.
EX FIS ishte donatori më i madh i Lëvizjes Vetëvendosje në zgjedhjet e vitit 2019, pasi që kishte dhuruar 9 mijë 534 euro donacion, më shumë se çdo individ apo kompani tjetër në këto zgjedhje.
Në vitin 2024 ishte raportuar se si EX FIS kishte tentuar t’i uzurponte pompat e derivateve në veri të Kosovës që ishin në pronësi të AKP-së, akoma pa u përmbyllur shpallja për dhënien e tyre në shfrytëzim. (Lexo: KËTU)
Përfitimet favorizuese të EX FIS nga shteti kishin kulmuar më 31 dhjetor 2025, pasi që kësaj kompanie i ishte zgjatur monopoli edhe për 7 vite për furnizim me kerozinë në Aeroportin e Prishtinës. (Lexo: KËTU)
Lexo edhe:
Si përfunduan milionat e KEK-ut te donatori i VV-së, “Ex Fis”?
KEK-u i jep sërish 260 mijë euro me negocim donatorit të VV-së, “Ex Fis”
Monopol në pistë nga Exfis : Kush përfiton nga furnizimi me karburante në Aeroportin e Prishtinës?
Gazetari Hamidi: Pronari i Ex-Fis ua lagë fytin pushtetarëve të Vetëvendosjes
Ndalja e milionave e monopolit të “Ex-Fis”, Ejupi dyshon se u sulmua për këtë arsye
