Me 28 qershor bëhen një vit prej kur Bashkimi Evropian përmes një deklarate kishte vendosur një paketë masash ndaj Kosovës. Edhe një vit pas vendosjes së këtyre masave, Kosovës veç sa po i shtohen kushte të reja për heqjen e tyre. Ani pse paraprakisht heqja e tyre ishte premtuar me mbajtjen e votimeve në veri të vendit në muajin prill të këtij viti dhe shtensionimin e situatës së sigurisë atje, një gjë e tillë nuk ndodhi, shkruan FrontOnline.
Përkundër saj, Bashkimi Evropian, thotë se kanë një mënyrë përmes së cilës do të mund të ia hiqnin Kosovës masat. Formimi i Asociacionit të Komunave Serbe, është kushti i ri nga BE.
Por dëmet nga vendosja e masave ndaj Kosovës kapin shifra milionëshe dhe bllokadë të shumë sektorëve.
Batusha: Masat e BE-së nuk krijuan dëm të madh, 5-7 milion është dëmi– As që bëhet fjalë formimi i Asociacionit si kusht për heqjen e masave
Deputeti i Vetëvendosjes, Agon Batusha, njëherit anëtar në Komisionin për Integrime Evropiane, për FrontOnline i quan të padrejta masat ndaj Kosovës, por se thotë se ka dakordim mes BE-së dhe Kosovës për de-eskalim të situates në Veri.
‘’Masat e BE-së ndaj Kosovës janë të padrejta, por gjithsesi se ka një dakordancë mes BE-së dhe Kosovës për de-eskalim dhe krejt ato ç’ janë kërkuar nga BE, janë përfundua, por masat nuk janë hequr. Kjo tregon për politikën e BE-së ndaj Ballkanit Perëndimor’’ thekson ai.
Batusha thotë se me deklaratën e shefit të zyrës së BE-së në Kosovë se masat hiqen kur Kosova formon Asociacionin, ai thotë se ky është kusht i ri dhe devalvon raportet.
‘’Me këtë që po e dëgjoj se BE ka vendos kushte të reja dhe kjo vetëm sa e devalvon raportin mes Kosovës dhe Serbisë. Ne kemi thënë se nuk ka qasje të balancuar’’ potencon ai.
Deputeti i VV-së, thotë se dëmet e shkaktuara nga masat e BE-së, janë 5-7 milion euro dhe se këto masa sipas tij nuk kanë krijuar dëm të madh.
‘’Sipas informacioneve që kemi ne, ato janë projekte që janë por që janë shtyrë janë 5-7 milionë €, ndërsa vazhdohet me marrëveshje të reja që i sjellin Kosovës miliona euro të tjera. Nuk është se këto masa kanë krijuar dëm të madh, por këto masa kanë krijuar dëm në raportet BE-Kosovë. Por masat e reja janë të padrejta’’ potencon ai për FrontOnline.
Batusha thotë se as që do të bëhet fjalë që të formohet asociacioni për heqjen e masave nga BE-ja për Kosovën dhe se e quan kusht të padrejt dhe presion ndaj Kosovës.
‘’As që bëhet fjalë me formu asociacionin për heqjen e masave, marrëveshja e asociacionit është në kuadër të 30 marrëveshjeve tjera, dhe vendosja si kusht e vetëm njërës pikë që nuk është as e para dhe as e fundit, dhe kjo e dëmton dialogun dhe është qasje e pabalancuar. Ky është presion i padrejte ndaj Kosovës dhe ne kemi thënë se Asociacioni bëhet në kohën e duhur dhe kur Serbia të implementoj marrëveshjet e bëra. Ne po shohim presion të Kosovës nga BE por jo ndaj Serbisë’’ përfundon ai për FrontOnline.
Krasniqi e LDK-së liston dëmet nga masat e BE-së: Për keqardhje qysh Asociacioni po del kusht për heqjen e masave ndaj Kosovës
Deputetja e LDK-së, Rrezarta Krasniqi, njëherit anëtare në Komisionin për Integrime Evropiane, për FrontOnline ka treguar shifrat e dëmeve nga masat e vendosura nga BE-ja ndaj Kosovës.
‘’Zyra e ZVK-së nuk po jep informacione. 92 milion euro është rrjeti i ujësjellësit dhe kanalizimit të Prishtinës, 9.95 milion euro është menaxhimi i mbeturinave, 7.2 milion euro është përmirësimi i rrjetit të transmisionit, 7 milion euro mbështetja e institucioneve, këto janë disa prej tyre, por 290 milion është totali. Këtë shumë e kam, por ka edhe më shumë por këta s’po tregojnë. Veç çka po mundemi me shkëputë informacione, i kam dërguar e-mail z.Bislmi por s’po përgjigjet’’ deklaron ajo.
Deputetja e LDK-së e konsideron keqardhje që formimi i Asociacionit me dalë si kusht për heqjen e masave të BE-së.
‘’Tash është për keqardhje që Asociacioni me dal kusht për heqjen e masave, ne kemi pasur kusht mbajtjen e peticionit në Veri dhe ai është plotësuar. Por ky kusht s’ka qenë kusht, por është për keqardhje kjo çka po dëgjojmë kohës së fundit, por se di çfarë marrëveshje ka Kurti me ta’’ shprehet ajo.
Krasniqi, thotë se krerët e shtetit janë zotuar për implementimin e Asociacionit, por nuk e mbajtën këtë zotim dhe për këtë dështoj edhe anëtarësimi i Kosovës në KiE.
‘’Krerët e shtetit janë zotuar për implementimin e asociacionit dhe aty kanë qenë dy pika dhe këta nuk janë përmbajtur asaj deklarata dhe për këtë dështoj edhe Kosova për KiE. Më herët nuk ka pasur kusht, por paska pasur kusht që Asociacioni, por s’paskan treguar. Nëse kanë bërë marrëveshje këta, unë nuk e di’’, përfundon ajo për FrontOnline.
Kadriaj e AAK-së: 500 milion euro dëme nga masat – Ditë të rënda e masa të rënda nga BE-ja pritet të vijnë për Kosovën
Deputetja e AAK-së, Time Kadriaj, për FrontOnline thotë se dëmet e shkaktuara nga vendosja e masave të BE-së ndaj Kosovës janë mbi 500 milion euro, por se nuk kanë shifra të sakta për këtë.
‘’I kemi kërkuar prej MPJ por edhe zyrës së ZVK-së, por nuk kemi marr përgjigje për shumën e dëmeve. Dëmet janë 500 milion euro nga fondet e BE-së si shkak i sanksioneve dhe është rreziku për humbje të fondeve tjera nga pakoja e BE-së për Ballkanin Perëndimor’’ deklaron ajo.
Deputetja Kadrijaj thotë se si opozitë kanë kërkuar në çdo takim heqjen e masave ndaj Kosovës, por se ndërkombëtarët kanë treguar kushtet e tyre.
‘’Edhe si opozitë në çdo takim me shefin e BE-së këtu kemi kërkuar që me u heq sanksionet, por ata na kanë treguar kushtet që duhet plotësuar, njëri nga kushtet ka qenë de-eskalimi i situatës në Veri, por po e shihni se Qeveria po merr vendime pa koordinim me ta në Veri e që kemi parë reagime edhe nga BE edhe nga DASH dhe këto veprime nuk janë lajm i mirë dhe ndikojnë që Kosovës mos me iu heq masat’’ deklaron ajo.
Kadriaj paralajmëron ditë të rënda për Kosovën dhe masa të rënda për Kosovën në ditët në vazhdim që do të vijnë nga BE-ja.
‘’Njëri nga kushtet ka qenë me punu Kosova në de-eskalim dhe jo në eskalim dhe faktori ndërkombëtar po i sheh si provokime dhe që munden me ndiku në eskalim në Veri dhe këto kanë qenë.Peticioni u bë, por masat nuk u hiqen, për Kosovën çdo ditë do të ketë ditë me të rënda, sanksione me të rënda në raport për rrugën e integrimit evropian’’ shton ajo për FrontOnline.
Njohësi i integrimeve: Për heqjen e masave të BE-së, Kosova duhet të formoj Asociacionin
Njohësi i çëshjve për integrime evropiane. Arbnor Sadiku, për FrontOnline thotë se janë afër 500 milion euro dëmet e shkaktuara nga vendosja e masave të BE-së ndaj Kosovës.
‘’Afërsisht 500 milion janë dëmet që janë shkaktuara nga vendosja e masave ndaj Kosovës’’, deklaron ai.
Sadiku, ka treguar edhe sektorët e prekur nga vendosja e masave të BE-së.
‘’Sektorët që kanë të bëjnë me sektorin ekonomik dhe projektet që kanë qenë për infrastrukturë, dhe projekte që kanë qenë të bëhen si salla të sportit dhe projekte tjera si fonde të Gizit, që janë të varura nga fondet e BE-së’’, thekson ai.
Ai thotë se për heqjen e masave të BE-së ndaj Kosovës, duhet formuar Asociacioni.
‘’Për heqjen e masave Kosova duhet formuar Asociacionin. Faktikisht Kosova e formon ASK-në ndërsa kthehen serbët në institucionet veriore. Ajo që dihet se një Asociacion do të themelohet por a është ky më i miri që do të bëhet do të shohim, për këtë është pajtuat edhe Kurti në Marrëveshjen e Ohrit’’, deklaron ai për FrontOnline.
